~~META:
title = Максім Танк — Рэквіем
&keywords = рукі, дно, промені
&abstract = Верш Максіма Танка "Рэквіем"
&iftrue = nan
~~

====== Максім Танк — Рэквіем ======
Святло касмічным пылам\\
рассыпалася ў зале.\\
Ты рукі апусціла\\
на клавішы раяля.\\
\\
Ты нам запела сагу,\\
што тоіць дно марское,\\
пра мужнасць і адвагу\\
загінуўшых герояў.\\
\\
Як чайкі ў буру, пальцы\\
на клавішах-ільдзінах\\
то прабавалі ўзняцца,\\
то падалі ў глыбіны.\\
\\
І галасілі гукі,\\
пакуль ім у тумане\\
не працягнула рукі,\\
як промені світання.\\
\\
Як промені, якімі\\
ты азарыла мора,\\
шукаючы любімых,\\
адплыўшых у прасторы.\\
\\
Ты клікала іх чула,\\
аж з рокатам прыліва,\\
з марскога дна пачула:\\
– Мы ля гармат, мы жывы.\\


 


===== Падобныя старонкі =====
  * [[творы/максім-танк/матывы-і-вобразы-паэзіі-максіма-танка]]
  * [[творы/максім-танк/ідэйны-змест-паэмы-максіма-танка-люцыян]]
  * [[постаці/максім-танк]]
  * [[творы/максім-танк/давераснёўская-творчасць-максіма-танка]]
  * [[творы/максім-танк/жыццё-і-творчасць-максіма-танка]]