~~META:
title = Максім Танк — Расшытае крыжыкамі
&keywords = крыжыкамі, расшытая
&abstract = Чытаць верш Максіма Танка "Расшытае крыжыкамі"
&iftrue = nan
~~

====== Максім Танк — Расшытае крыжыкамі ======
Ўзору не знаю я прыгажэйшага,\\
Як расшытая крыжыкамі\\
Трыпутніку ці канюшыны,\\
Бацькоўскіх ці маіх босых ног –\\
Палявая дарога;\\
\\
Як расшытая крыжыкамі мулінэ\\
I калісьці падораная мне\\
Дзяўчынай кашуля;\\
\\
Як расшытае крыжыкамі крыл\\
Жаўрукоў,\\
Ластавак,\\
Журавоў\\
Неба нада мной;\\
\\
Як расшытыя крыжыкамі\\
Ручнікі,\\
Што на покуце ззяюць,\\
Стому з твару сціраюць\\
I на якіх маладым і гасцям\\
Мы падносім\\
Хлеб-соль...\\
\\
Не, недарма, знаць,\\
Арнаментам гэтым –\\
А не дзідамі і арламі,\\
Не шаблямі і львамі –\\
Упрыгожвалі\\
Наша жыццё.\\
\\
13.ІІІ.89\\
\\


Крыніца: Танк Максім. Мой каўчэг: Вершы. 1989-1992. – Мн.: Маст. літ., 1994. – 207 с.

 


===== Падобныя старонкі =====
  * [[творы/максім-танк/жыццё-і-творчасць-максіма-танка]]
  * [[постаці/максім-танк]]
  * [[творы/максім-танк/ідэйны-змест-паэмы-максіма-танка-люцыян]]
  * [[творы/максім-танк/матывы-і-вобразы-паэзіі-максіма-танка]]
  * [[творы/максім-танк/давераснёўская-творчасць-максіма-танка]]