~~META:
title = Максім Танк — Пах баравіковы
&keywords = значыць, восень
&abstract = Максіма Танка "Пах баравіковы"
&iftrue = nan
~~

====== Максім Танк — Пах баравіковы ======
Дык, значыць, восень зноў брыдзе разлогамі.\\
Ля печы сушацца з цыбуляй разам\\
Вянкі грыбоў – лясныя анталогіі\\
Неверагодных, фантастычных казак.\\
\\
Вось гэты баравік рос там, дзе забалаць\\
(Пад лён зязюльчын нават шапкі колер).\\
Ён можа расказаць, як шуміць папараць\\
I ваўчанят вядзе ваўчыца борам.\\
\\
А гэты жыў, дзе ягаднікі сінія.\\
Прапах увесь п’янічнікам, ядлоўцам.\\
Ён знае закуткі цецеравіныя,\\
Нябачныя для воч людскіх і сонца.\\
\\
А гэты быў прысыпаны ігліцаю\\
На верасам расквечаным пагорку.\\
Ён знае баравыя таямніцы ўсе\\
Пра барсука, пра дзятла, пра вавёрку.\\
\\
Я іх збіраў. I мо’ таму да раніцы\\
Прыпамінаюцца мне ўсе грыбныя сховы.\\
Дык, значыць, восень зноў, калі ўрываецца\\
I ў сон і ў сэрца пах баравіковы.\\
\\
1964

 


===== Падобныя старонкі =====
  * [[творы/максім-танк/матывы-і-вобразы-паэзіі-максіма-танка]]
  * [[постаці/максім-танк]]
  * [[творы/максім-танк/давераснёўская-творчасць-максіма-танка]]
  * [[творы/максім-танк/ідэйны-змест-паэмы-максіма-танка-люцыян]]
  * [[творы/максім-танк/жыццё-і-творчасць-максіма-танка]]