~~META:
title = Максім Танк — Павязлі цягнікі
&keywords = сонца, восень
&abstract = Верш Максіма Танка "Павязлі цягнікі"
&iftrue = nan
~~

====== Максім Танк — Павязлі цягнікі ======
Павязлі цягнікі\\
Восень з вёсак у горад\\
Праз імглу,\\
Праз іржышча, бары, –\\
Каб з антонавак сонца\\
І з стагоў памідораў\\
Дагарала на шыбах вітрын.\\
\\
Ды ніколі не можна\\
Было ўдоваль напіцца\\
Таго сонца сіротам малым\\
З беспрацоўных кварталаў,\\
Сівым камяніцам,\\
Сутарэнням глыбокім,\\
Сырым.\\
\\
Але можна было\\
Складаць песні пра восень\\
І пра жоўтае лісце\\
Дарожных бяроз.\\
Ў кожным слове шумелі\\
Мільёны калосся\\
І звінела сталь вострая кос.\\
\\
Толькі, гэткую песню\\
Пачуўшы, вітрыны\\
Раптам гаслі,\\
Трывожна крычалі гудкі...\\
І ляцелі на вёскі\\
З новай весткай няспынна\\
Ашалелыя,\\
З грывай агню\\
Цягнікі.\\
\\
Іх на кожным паўстанку,\\
Бы ўраджайнае лета,\\
Спатыкалі дзяўчаты\\
І хмары касцоў,\\
І з усёй Беларусі\\
Скрыпачы і паэты, –\\
А іх больш, як ў краіне\\
Маёй каласоў!\\
\\
1937

 


===== Падобныя старонкі =====
  * [[творы/максім-танк/ідэйны-змест-паэмы-максіма-танка-люцыян]]
  * [[постаці/максім-танк]]
  * [[творы/максім-танк/жыццё-і-творчасць-максіма-танка]]
  * [[творы/максім-танк/давераснёўская-творчасць-максіма-танка]]
  * [[творы/максім-танк/матывы-і-вобразы-паэзіі-максіма-танка]]