~~META:
title = Максім Танк — Нашто ты косы заплятаеш...
&keywords = перад, нашто
&abstract = Чытаць верш Максіма Танка "Нашто ты косы заплятаеш..."
&iftrue = nan
~~

====== Максім Танк — Нашто ты косы заплятаеш... ======
Нашто ты косы заплятаеш,\\
У танцы кружыш агнявым,\\
Нашто каралі прымяраеш\\
Перад люстэркам нежывым?\\
\\
Яно маўчыць, яно не можа\\
I сотай долі перадаць,\\
Як выглядаеш ты прыгожа,\\
Як вочы зорамі гараць.\\
\\
Ты лепш пакліч мяне, красуня,\\
Хоць на хвіліну да сябе,\\
I мне не будзе гэтак сумна,\\
І я дапамагу табе\\
\\
Прымераць стужкі, завушнічкі,\\
I плечы хусткай ахінуць,\\
I лакавыя чаравічкі\\
Перад "Лявоніхай" абуць.\\
\\
Ты ўсё мне дараваць не можаш,\\
Што першы раз як памагаў,\\
Караляў шнур неасцярожна\\
Рукой няўмелаю парваў.\\
\\
1955

 


===== Падобныя старонкі =====
  * [[творы/максім-танк/давераснёўская-творчасць-максіма-танка]]
  * [[творы/максім-танк/ідэйны-змест-паэмы-максіма-танка-люцыян]]
  * [[постаці/максім-танк]]
  * [[творы/максім-танк/жыццё-і-творчасць-максіма-танка]]
  * [[творы/максім-танк/матывы-і-вобразы-паэзіі-максіма-танка]]