~~META:
title = Максім Танк — Лемантар
&keywords = юргіня, лямеш, чырок, разлог, еўня, гумнішча
&abstract = Чытаць верш Максіма Танка "Лемантар"
&iftrue = nan
~~

====== Максім Танк — Лемантар ======
Добры дзень, мой браце юны!\\
Я прынёс табе як дар\\
Ад Скарыны-бацькі кнігу –\\
Беларускі лемантар.\\
\\
Гэта – ключ ад скарбаў нашай\\
Мовы матчынай, з якой\\
Ты не станешся самотнай,\\
Безыменнай сіратой.\\
\\
Дык раскрый яго з любоўю –\\
Літар стройныя рады\\
Прачытай і паўтары іх,\\
І запомні назаўжды.\\
\\
А – Айчына. Арабіна.\\
Б – Бабёр. Буслянка. Брод.\\
В – Вавёрка. Верабейка.\\
Г – Гумнішча. Гарызонт.\\
Д – Дуброва. Дом. Дарога.\\
Е – Еўропа. Ездавы.\\
Ё – Ёўня. Ёршык. Ёлка.\\
Ж – Жніво. Жур. Журавы.\\
З – Зямля. Зіма. Завея.\\
І – Іголка. Іпадром.\\
К – Купала. Колас. Кніга.\\
Л – Лямеш. Лапата. Лом.\\
М – Мятліца. Медуніца.\\
Н – Настольнік. Нож. Навой.\\
О – Ордэн. Оптык. Ода.\\
П – Падлесак. Пень. Падвой.\\
Р – Рака. Разлог. Ракіта.\\
С – Сланечнік. Самалёт.\\
Т – Тапчан. Тачыла. Трактар.\\
У – Убор. Уток. Удод.\\
Ф – Флагшток. Фуганак. Флейта.\\
Х – Хлеб. Халадзец. Хадок.\\
Ц – Цвыркун. Цясляр. Цабэрак.\\
Ч – Чарот. Чырок. Чаўнок.\\
Ш – Шахцёр. Шпакоўня. Школа.\\
Э – Эстрада. Эшалон.\\
Ю – Юнак. Юргіня. Юрта.\\
Я – Апошні перазвон.\\
\\
І таму, хто вымаўляе\\
Гэту літару ў жыцці,\\
Трэба быць сумленным, смелым,\\
Супраць злыбяды ісці.\\
\\
Каб свабода і братэрства\\
Ззялі сполахам зары.\\
Вось якія скарбы, дружа,\\
Знойдзеш ты ў лемантары.

\\
Гумнішча – месца, на якім стаяла гумно;\\
Ёўня – памяшканне для сушкі снапоў;\\
Жур – негусты аўсяны кісель;\\
Лямеш – ніжняя частка плуга;\\
Разлог – абшар, адкрытая прастора;\\
Чырок – невялікая качка;\\
Юргіня – вяргіня (кветка).

 


===== Падобныя старонкі =====
  * [[творы/максім-танк/давераснёўская-творчасць-максіма-танка]]
  * [[творы/максім-танк/жыццё-і-творчасць-максіма-танка]]
  * [[творы/максім-танк/ідэйны-змест-паэмы-максіма-танка-люцыян]]
  * [[творы/максім-танк/матывы-і-вобразы-паэзіі-максіма-танка]]
  * [[постаці/максім-танк]]