~~META:
title = Максім Танк — Зіма на бацькаўшчыне
&keywords = снег
&abstract = Верш Максіма Танка "Зіма на бацькаўшчыне"
&iftrue = nan
~~

====== Максім Танк — Зіма на бацькаўшчыне ======
Дзень цэлы плавалі вятры\\
Над восенню палёў бязмежных,\\
Пад вечар снегам завірыў\\
Спазніўшыся кудлаты снежань.\\
Ён ахінуў стагі лугоў,\\
Як верацёны, снежнай воўнай,\\
З-пад Налібок, з балот, лясоў\\
Плыты ільдзін пагнаў па Нёмну.\\
Ён хвалі дрэмлючай раллі\\
Рвануў за вараныя грывы, –\\
І ажылі, і паплылі\\
На бор уздыбленыя нівы.\\
\\
Але навалу хмар цяжкіх\\
Стрымалі выгнуўшыся хвоі.\\
Адно па соснах залатых\\
Узнялося полымя сівое,\\
У змрочных лапках зацвіло,\\
З бяроз успыхнуўшага вецця\\
На сухастой, на буралом\\
Яго панёс аслепшы вецер.\\
Збудзіўся нетраў цёмны гул,\\
З лагоўяў воўчых і выкопаў\\
Папоўз па свежаму снягу,\\
Па выбітых руёю тропах.\\
\\
Зіма… Ад інею вішняк\\
Перахіліўся за парканы.\\
І не мінеш яго ніяк,\\
Кранеш – і цветам серабраным\\
Асыпе з галавы да ног.\\
На дзеннікі вароны стадам\\
Лятуць з прасёлачных дарог.\\
Іх цень плыве праз палісады,\\
Дзе ўсё, як вогнішча лістоў,\\
Замёў снег свежы, сшаранелы,\\
Дзе першых заяччых слядоў\\
Глухія петлі забялелі.\\
\\
Калі-ж, вячэрняю парой,\\
За вёску выйдзеш на прыволле,\\
Цябе сустрэнуць чарадой\\
Шляхоў знаёмыя таполі,\\
Пачуеш як трашчыць рака,\\
Скрыпяць асверы на марозе,\\
Як пад дугой маладзіка\\
Пяюць сялянскія палоззя.\\
І шляху зорнага aгнi\\
У кожнай у сняжынцы ззяюць\\
І ў сэрцы, што з далечыні\\
Па родным сумавала краю.

 


===== Падобныя старонкі =====
  * [[творы/максім-танк/жыццё-і-творчасць-максіма-танка]]
  * [[творы/максім-танк/ідэйны-змест-паэмы-максіма-танка-люцыян]]
  * [[творы/максім-танк/давераснёўская-творчасць-максіма-танка]]
  * [[творы/максім-танк/матывы-і-вобразы-паэзіі-максіма-танка]]
  * [[постаці/максім-танк]]