~~META:
title = Максім Танк — Галінка і верабей
&keywords = дзяцей, калыхаць, галінку, ламаць, хочуць, казуляў, казулі, галінка, пабеглі
&abstract = Чытаць вершык Максіма Танка "Галінка і верабей"
&iftrue = nan
~~

====== Максім Танк — Галінка і верабей ======
– Галінка-вярбінка, –\\
Прасіў верабей, –\\
Мо пакалыхала б\\
Маіх ты дзяцей?\\
\\
Галінка не хоча\\
Дзяцей калыхаць.\\
– Ідзіце, казулі,\\
Галінку ламаць!\\
\\
Казулі не хочуць.\\
– Ідзіце, ваўкі,\\
Лавіці, караці\\
Казуляў такіх,\\
Якія не хочуць\\
Галінку ламаць,\\
Якая не хоча\\
Дзяцей калыхаць.\\
\\
Ваўкі не схацелі.\\
– Прыходзьце, стральцы,\\
Каб непаслухмяных\\
Ваўкоў правучыць,\\
Якія не хочуць\\
Казуляў караць,\\
Якія ляняцца\\
Галінку ламаць,\\
Якая не хоча\\
Дзяцей калыхаць...\\
\\
Пайшлі паляўнічыя\\
Ў лес на ваўкоў:\\
Спалохана зверы\\
Пабеглі з дуброў,\\
Пабеглі казуляў\\
Лавіць і караць;\\
Казулі пабеглі\\
Галінку ламаць;\\
Галінка ж вярбінка\\
Са страху хутчэй\\
Давай калыхаць\\
Вераб’іных дзяцей.\\
\\
З тых дзён без спачынку,\\
Каб кожны быў рад,\\
Калыша галінка\\
Усіх птушанят.

 


===== Падобныя старонкі =====
  * [[творы/максім-танк/матывы-і-вобразы-паэзіі-максіма-танка]]
  * [[творы/максім-танк/жыццё-і-творчасць-максіма-танка]]
  * [[постаці/максім-танк]]
  * [[творы/максім-танк/давераснёўская-творчасць-максіма-танка]]
  * [[творы/максім-танк/ідэйны-змест-паэмы-максіма-танка-люцыян]]