~~META:
title = Максім Танк — Восень
&keywords = восень, падпаліла, касцёр, зямлі, край
&abstract = Верш "Восень" Максіма Танка
&iftrue = nan
~~

====== Максім Танк — Восень ======
Над палямі хістаўся пашчэрблены месяц.\\
Вецер дзьмуў, і шумеў па-над Нёманам бор.\\
Восень вецце сухое зграбла і на ўзлессі\\
Падпаліла пагрэцца начлежны касцёр.\\
\\
Падпаліла касцёр, прылягла у тумане,\\
Ды кароткім быў гэты пад зорамі сон:\\
Крык трывожны птушыны збудзіў яе рана,\\
Па зямлі ад кастра разліваўся агонь.\\
\\
Загарэліся гнёзды, і іскры пажару\\
Пачала яна з птушкамі, з ветрам гасіць.\\
Толькі полымя ўжо разлілося ў імшарах,\\
Па лясах і палях, па курганах брусніц.\\
\\
І па сённяшні дзень восень жару не можа\\
Пагасіць на зямлі, ходзе з краю у край,\\
Заліваючы ліўнямі ў полі бярозы\\
І цалуючы кожны рабінавы гай.

 


===== Падобныя старонкі =====
  * [[творы/максім-танк/давераснёўская-творчасць-максіма-танка]]
  * [[творы/максім-танк/ідэйны-змест-паэмы-максіма-танка-люцыян]]
  * [[постаці/максім-танк]]
  * [[творы/максім-танк/матывы-і-вобразы-паэзіі-максіма-танка]]
  * [[творы/максім-танк/жыццё-і-творчасць-максіма-танка]]