~~META:
title = Максім Танк — Бабка
&keywords = ліст, бабка
&abstract = Верш Максіма Танка "Бабка"
&iftrue = nan
~~

====== Максім Танк — Бабка ======
Ходзіць бабка лесам-гаем,\\
У хусціначку збірае:\\
Даланясты ліст кляновы –\\
Хлеб на ім пячы жытнёвы,\\
А дубовы ліст – для бочкі,\\
Каб хрумсцелі агурочкі,\\
А бабоўнік кучаравы –\\
Каб не страціць смак да стравы,\\
Ліст малінавы – для чаю,\\
Што ад кашлю памагае,\\
Жменьку ядлаўцовых ягад –\\
Для лячэбных кропель – брагі\\
Ад дакучлівай ламоты,\\
Рознай там непамыслоты...\\
Ачаплялася лістамі,\\
Ягаднікамі, імхамі,\\
Што, як сядзе ў цень мурожны,\\
І вавёрка не адрозніць:\\
Ці то бабка каля сцежкі,\\
Ці пянёк, ці сыраежка?\\
\\
1961

 


===== Падобныя старонкі =====
  * [[творы/максім-танк/ідэйны-змест-паэмы-максіма-танка-люцыян]]
  * [[творы/максім-танк/давераснёўская-творчасць-максіма-танка]]
  * [[творы/максім-танк/жыццё-і-творчасць-максіма-танка]]
  * [[творы/максім-танк/матывы-і-вобразы-паэзіі-максіма-танка]]
  * [[постаці/максім-танк]]