~~META:
title = Максім Танк — Ад дажджоў стары гасцінец...
&keywords = вецер, бору, крыллямі, залопаў
&abstract = Чытаць верш Максіма Танка "Ад дажджоў стары гасцінец..."
&iftrue = nan
~~

====== Максім Танк — Ад дажджоў стары гасцінец... ======
Ад дажджоў стары гасцінец\\
Пашарэў і пацямнеў,\\
Толькі вецер ярка сініць\\
Веснавую зелень дрэў.\\
\\
Сонца высака на небе,\\
Не дастанеш качаргой;\\
Залатога бору грэбень\\
Пахне шышкамі, смалой.\\
\\
Я запеў, а рэха бору\\
У мяне над галавой\\
Разагнала мае зоры,\\
Залаты і звонкі рой.\\
\\
Мо’ неасцярожна спудзіў?\\
Ну, вярніцеся назад, –\\
Весяліцца разам будзем,\\
Я ваш блізкі, родны брат.\\
\\
I па шышках, і па тропах\\
З камарыным звонам зор\\
Месяц крыллямі залопаў,\\
Ападаючы за бор.\\
\\
Прыляцелі дзівы-птушкі\\
I з лагоў лясных звяры,\\
Пад сасновыя частушкі\\
П’яны вецер завірыў...\\
\\
З дзён тых поўных чараў казкі,\\
Пад напеў дарожных лоз,\\
Стаў я песняром сялянскім\\
Гэтых сцежак і бяроз.\\
\\
1937

 


===== Падобныя старонкі =====
  * [[творы/максім-танк/матывы-і-вобразы-паэзіі-максіма-танка]]
  * [[творы/максім-танк/ідэйны-змест-паэмы-максіма-танка-люцыян]]
  * [[творы/максім-танк/давераснёўская-творчасць-максіма-танка]]
  * [[постаці/максім-танк]]
  * [[творы/максім-танк/жыццё-і-творчасць-максіма-танка]]