~~META:
title = Максім Лужанін — Чарнобыльскі вецер
&keywords = голас, ціўкнуць, вёска, палын
&abstract = Чытаць верш Максіма Лужаніна "Чарнобыльскі вецер"
&iftrue = nan
~~

====== Максім Лужанін — Чарнобыльскі вецер ======
Вёска.\\
Золак.\\
Зор скупая жменька.\\
Сама раз турботы пачынаць.\\
Анікім-кагенька, анічым-чагенька,\\
Не чутно ні вераб’я, ні певуна.\\
\\
Можа, пад нядзельку позна спаць палеглі,\\
Ціха і ў суседзяў на двары.\\
Дзе ж ты, дзядзька Лаўрык, дзе ж вы, цётка Тэкля?\\
Было ўсюды поўна вас аб той пары.\\
\\
Дзверы незамкнуты. Выйшлі ненадоўга:\\
Можа, дзе бяруць баравікі,\\
Ці каровы пасвіць выпала радоўка,\\
Ці ў царкву на споведзь клікнулі грахі?\\
\\
Пэўна, заблудзіў я, не туды прыехаў, –\\
Мне павінен ціўкнуць голас хоць адзін...\\
З вокнаў хат гарбатых вецер гоніць рэха\\
Пад крыжы.\\
За вёску.\\
З палыну ў палын.\\


\\
Крыніца: Прайсці праз зону. Кн. 2. Проза, паэзія, публіцыстыка / Уклад. І. Бутовіч; Маст. В. Шкаруба. Мн.: Маст. літ., 2001. – 558 с.

 


===== Падобныя старонкі =====
  * [[творы/артур-вольскі/артур-вольскі-боль-чарнобыля]]
  * [[творы/алесь-пісьмянкоў/алесь-пісьмянкоў-1986]]
  * [[творы/мікола-мятліцкі/мікола-мятліцкі-санеты-чарнобыля]]
  * [[творы/пімен-панчанка/пімен-панчанка-аб-самым-смачным]]
  * [[творы/іншае/сучасная-літаратура-беларусі/тэма-чарнобыля-ў-беларускай-паэзіі]]