~~META:
title = Максім Лужанін — Дарога песні
&keywords = будзь, свет, беларускаю
&abstract = Чытаць верш Максіма Лужаніна "Дарога песні"
&iftrue = nan
~~

====== Максім Лужанін — Дарога песні ======
Пушчай ідзеш ці пусткаю,\\
Дома, ў чужой зямлі,\\
Песня, будзь беларускаю\\
I пад вясельнай хусткаю\\
I ў баявым шынялі.\\
\\
Людзі з вуснаў у вусны\\
Прымуць, перададуць,\\
Толькі будзь праўды лустаю,\\
Толькі сабою будзь.\\
\\
Хмелю густую брагу,\\
Белы убор калін,\\
Сонца ліпнёвых ягад,\\
Нівы тугі наліў, –\\
Несла ты сцежкай грузкаю,\\
Вузкай, без каляін...\\
\\
З вогненнай ператрускаю\\
Выйшла ў свет беларускаю,\\
Як цябе ні клялі.\\
\\
1973\\
\\


Крыніца: Лужанін М. Збор твораў. У 4-х т. Т. 3. Падарожныя нізкі; Вершы 1966-1973; Як нараджаўся новы свет; Рэпартаж з рубцом на сэрцы. – Мінск: Мастацкая літаратура, 1981. – 512 с.

 


===== Падобныя старонкі =====
  * [[творы/ян-чачот/ян-чачот-песні-і-балады]]
  * [[слоўнік/вясельныя-песні]]
  * [[слоўнік/валачобныя-песні]]
  * [[слоўнік/песня]]
  * [[слоўнік/восеньскія-песні]]