~~META:
title = Максім Гарэцкі — Стогны душы
&keywords = стогн, душа, жыццё, ланцуг
&abstract = Чытаць апавяданне "Стогны душы" Максіма Гарэцкага
&iftrue = True
~~

====== Максім Гарэцкі — Стогны душы ======
...Шумяць галіны на бярозах, шуміць-гудзе вецер, кідаецца ён мякка — неслухмяны — ка мне ў акно і рве на стале паперы. Звініць недзе муха, звініць, быццам увосень перад смерцю... Верабей хутка пратрос пад страхою сваю песню... А мне ізноў нудна, нудна, нудна... Я не хварэю ўсясветнай журбой-жудою, не, не, — я хварэю нечым другім, але чым?\\
Я жыць хачу вольным жыццём — жыццём радасці, добрага, вясёлага смеху і ўсяго таго, што побач з другім творыць гармонію жыцця. Я хачу новага, лепшага жыцця. Я крэпка, усімі сваімі сіламі жадаю яго! Бо нездаволен, вельмі нездаволен... Як толькі стаў я мець сваё сумленне, маю вялікую ахвоту, думку сэрца, як бы выпаўзці самому і другіх вызваліць з гэтага жыцця. Бо ў ім навакол адны аграмадныя, гідкія камы бруду, бруду дрэннага, гнойнага... Я не хачу трываць! I не вытрываю, бо нельга вытрываць. Я скіну, сарву ланцугі свайго старога жыцця і зраблю жыццё новае. Зраблю! Парву ланцугі спрадвечнай гульні-лені, ланцугі глуму, шальмоўства і страшэннай, аграмаднай цемнаты векавечнай, тыя ланцугі, што робяць з чалавека скаціну, быдлё, што твораць «папоў» і «мужыкоў». Ланцугі гэтыя выдумаў хіба сам Люцыпар, скаваў іх у сваёй кузні і скрыўдзіў імі ўсіх людзей усяго свету, што жылі і паўміралі, што мадзеюць і цяпер, хварэючы ад гэтых ланцугоў... Няможна, няможна! Гэтак не павінна быць і не можа быць!..

 


===== Падобныя старонкі =====
  * [[творы/уладзімір-жылка/уладзімір-жылка-душа-мая-тужлівая]]
  * [[творы/віктар-карамазаў/віктар-карамазаў-зачараваная-душа]]
  * [[творы/алесь-бадак/алесь-бадак-душа]]
  * [[творы/сяргей-грахоўскі/сяргей-грахоўскі-душа]]
  * [[творы/рыгор-барадулін/рыгор-барадулін-душа-баліць]]