~~META:
title = Максім Гарэцкі — Максімава зязюля
&keywords = зязюля
&abstract = Чытаць версэт Макісма Гарэцкага "Максімава зязюля"
&iftrue = True
~~

====== Максім Гарэцкі — Максімава зязюля ======
Пуста мне ў дарозе. Ні душы...\\
Лес і лес. Кедры, лісцвянкі, бярозы, малады параснік, кусты каля балот.\\
І не сказаць, каб усё гэта было вельмі пышна, густа ці наогул прыгожа. Звычайны лес, часам даволі рэдкі і нават дробны.\\
А галоўнае – нейкая адвечная маўклівая нуда пануе тут і гняце думкі і пачуццё. І птушак не чуваць. Толькі зрэдку тарабаніць жаўна.\\
Вось я выходжу на большы прагал, зелянейшы ад бяроз на яго ўскрайках, – дзесьці далёка і неяк асабліва сумна закукавала сібірская зязюля.\\
– Ку-ку ! Ку-ку!\\
І мне ўспомніліся яго сумныя вершы:\\
– [[творы/максім-багдановіч/не-кувай-ты-шэрая-зязюля|Не кувай ты, шэрая зязюля]]!..\\
Ці прылятае яна, шэрая, там, у Крыме, пакукаваці яму?\\
І дзе будзе маё апошняе прытулішча?\\
Можа тут, у Сібіры, – як і яму, на далёкай чужыне?\\
І колькі, колькі нас, хадакоў і перасяленцаў, слухалі тут гэта сумнае кукаванне, прыгадваючы сабе бары мілае далёкае бацькаўшчыны?

 


===== Падобныя старонкі =====
  * [[ibdc.ped>зязюльчыны-слёзы]]
  * [[творы/эдуард-валасевіч/эдуард-валасевіч-зязюльчын-сынок]]
  * [[ibdc.ped>нахабная-зязюля]]
  * [[творы/максім-багдановіч/не-кувай-ты-шэрая-зязюля]]
  * [[ibdc.ped>зязюльчыны-слёзкі]]