~~META:
title = Максім Багдановіч — Цёплы вечар, ціхі вецер, свежы стог...
&keywords = зоркі, ціхі, вецер, знічка, прыродай, дрыжаць, агністаю, бледны, прыроды
&abstract = Чытаць верш Максіма Багдановіча "Цёплы вечар, ціхі вецер, свежы стог..." Адказы на пытанні да верша
&iftrue = nan
~~

====== Максім Багдановіч — Цёплы вечар, ціхі вецер, свежы стог... ======
Цёплы вечар, ціхі вецер, свежы стог,\\
Улажылі спаць мяне вы на зямлі.\\
Не курыцца светлы пыл усцяж дарог,\\
Ў небе месяца праглянуў бледны рог,\\
Ў небе ціха зоркі расцвілі.\\
\\
Знічка коціцца агністаю слязой,\\
Прашумела мякка скрыдламі сава;\\
Бачу я, з прыродай зліўшыся душой,\\
Як дрыжаць ад ветру зоркі нада мной,\\
Чую ў цішы, як расце трава.\\


**Адказы на пытанні:**\\
\\
1. Наступныя радкі найярчэй перадаюць злітнасць чалавека з прыродай:\\
\\
Бачу я, з прыродай зліўшыся душой,\\
Як дрыжаць ад ветру зоркі нада мной,\\
Чую ў цішы, як расце трава.\\
\\
Лірычны герой прылёг вечарам адпачыць у свежым стозе і адчуў моцнае яднанне з навакольным светам, адчуў самыя патаемныя рухі прыроды. Ён адчувае гармонію прыроды і злітнасць з ёю.\\
2. Калі ўначы бачыш, як падае знічка з неба, за ёю цягнецца невялікі залацісты шлейф, таму можа ўзнікаць асацыяцыя знічкі з агністаю слязой.\\
3. Паўтарэнне зычных гукаў "ц – ц – ц – с – с" перадае нам гукі надыходзячага вечара – ціхі вецер, цырканне цыкад, мяккі шум травы і дрэў, прырода сцішваецца, засынае.\\
У наступнай страфе ідзе працяг павольнага сцішвання прыроды: "З-ч-ц-с-с", "ш-с-с", "ч-з-ш" і г.д.\\
4. Мелодыя верша ствараецца наступнымі мастацкімі сродкамі:\\
Аўтар выкарыстоўвае яркія [[слоўнік/эпітэт|эпітэты]]: ціхі вецер, светлы пыл, бледны рог, агністая сляза.\\
[[слоўнік/метафара|Метафары]]: месяца праглянуў бледны рог, знічка коціцца агністаю слязою, ціха зоркі расцвілі, дрыжаць зоркі.\\
Танальнасць верша задуменная, сцішаная, спакойная. Такі ж і [[слоўнік/рытм|рытм]]. Верш напісаны [[слоўнік/харэй|харэем]], які надае гучанню спеўнасць, задумлівасць, мілагучнасць, павольнасць.

 


===== Падобныя старонкі =====
  * [[творы/цішка-гартны/цішка-гартны-зімовы-вечар]]
  * [[творы/аляксей-дудараў/аляксей-дудараў-вечар]]
  * [[творы/максім-багдановіч/максім-багдановіч-вечар-на-захадзе-ў-поп]]
  * [[творы/эдзі-агняцвет/эдзі-агняцвет-ціхі-вечар]]
  * [[творы/янка-журба/янка-журба-у-зімовы-вечар]]