~~META:
title = Максім Багдановіч — Страцім-лебедзь
&keywords = Багдановіч, страцім, лебедзь
&abstract = Чытаць верш "Страцім-лебедзь" Максіма Багдановіча
&iftrue = nan
~~

====== Максім Багдановіч — Страцім-лебедзь ======
Не анёл у трубу уструбіў —\\
З хмары бог старому Ною гаварыў:\\
«Поўна з краем чаша гневу майго\\
На людскія грахі ды бясчыннасці.\\
Вось надойдзе часіна суворая,\\
Лінуць з неба залівы бязмерныя\\
I абмыюць ад бруду смуроднага\\
Ўсю зямлю яны, белы-вольны свет».\\
\\
Пачынаў тут Ной будаваць каўчэг\\
З таго дзерава ліванскага.\\
Ўшыркі гэтаму каўчэгу — сто лакцёў,\\
A ўдаўжкі — болей тысячы.\\
Ды узяў туды Ной і птах і звяроў,\\
Каб не звёўся іх род з зямлі.\\
Ды не плыў к яму з мора сіняга\\
Страцім-лебедзь — горды, моцны птах.\\
Яго звычаі — арліныя,\\
Яго ўцехі — сакаліныя;\\
Пер'і-пер'ечкі бялеюцца\\
Ды на золку агнявеюцца.\\
У яго ў крыле — трыста тры пяра:\\
Узмахне крылом — быццам бор шуміць,\\
Узмахне другім — што мяцель гудзіць.\\
Як учнуць дажджы,— пацякла вада,\\
Разлілася горш ад павадка.\\
Затапіла ўсе лугі-лагі,\\
Ўсе лугі-лагі, ўсе лясы-бары;\\
Уздымаецца вышэй ад гор.\\
Птахі ў небе стаяй лётаюць,\\
Енчаць жаласна, ад нуды крычаць,\\
Выглядаюць стуль прытулачку.\\
A па ўсёй зямлі толькі хвалі б'юць,\\
Толькі хвалі б'юць белай пенаю.\\
Ды па іх дужы, смелы плавае\\
Страцім-лебедзь — горды, моцны птах.\\
Узмахне крылом — быццам бор шуміць,\\
Узмахне другім — як мяцель гудзіць.\\
I населі тут на лебедзя\\
Птахі дробныя ўсёй стаяю.\\
Лебедзь з сілы выбіваецца,\\
Птушкі ажна усцяшаюцца.\\
Дзень ён плавае, другі-трэці дзень,\\
На чацвёрты стаў прасіць-маліць:\\
«Вы ўзляціце хоць на час які,\\
Выбіваюся з астатніх сіл.\\
Дайце вы грудзям, гэй, вальней ўздыхнуць!\\
Дайце вы крылам, гэй, шырэй ўзмахнуць!»\\
Не паслухалі птахі лебедзя.\\
Пацямнела у яго ў вачах,\\
Крыллі ўрэшце надламаліся,\\
Галава ў ваду апусцілася.\\
І пайшоў на дно мора сіняга\\
Страцім-лебедзь — моцны, горды птах.\\
\\
Ад усіх цяпер патомкі ёсць,\\
Ды няма адных — Страцімавых.

1. У аснову [[слоўнік/канфлікт|канфлікта]] твора пастаўлены вобраз самаахвярнага птаха, які адмовіўся ад выратавання ў Ноевым каўчэгу, уступіў у адзінаборства са стыхіяй патопу і, хоць сам гінуў, даваў жыццё іншым птахам.\\
2. Зварот аўтара да біблейскага міфа быў выкліканы вайной, пагібеллю мільёнаў і яго ўласным лёсам.\\
3. [[слоўнік/інверсія|Інверсія]] (іншасказанне) і [[слоўнік/гіпербала|гіпербала]] (перабольшанне) дапамагаюць аўтару стварыць вобраз гордага лебядзя, паказаць сілу яго душы. Народная легенда асуджала птаха, а Максім Багдановіч надзяліў яго здольнасцю ратаваць іншых птушак, ахвяраваць сваім жыццём дзеля іншых.

 


===== Падобныя старонкі =====
  * [[творы/уладзімір-ягоўдзік/уладзімір-ягоўдзік-лебедзь]]
  * [[ibdc.ped>лебедзі]]
  * [[творы/максім-багдановіч/творчасць-максіма-багдановіча]]
  * [[творы/максім-багдановіч/патрыятычная-лірыка-максіма-багдановіча]]
  * [[ibdc.ped>ля-жывой-крыніцы]]