~~META:
title = Максім Багдановіч — Санет (Паміж пяскоў Егіпецкай зямлі...)
&keywords = Багдановіч, санет
&abstract = Чытаць "Санет" Максіма Багдановіча (Паміж пяскоў Егіпецкай зямлі...)
&iftrue = nan
~~

====== Максім Багдановіч — Санет (Паміж пяскоў Егіпецкай зямлі...) ======
Ахвярую А. Пагодзіну\\
\\
Un sonnet défaut vaut\\
seul un long poéme.\\
Boiteau*\\
\\
(* Беззаганны санет варты\\
адзін цэлай паэмы.\\
Буало)

\\
Паміж пяскоў Егіпецкай зямлі,\\
Над хвалямі сінеючага Ніла,\\
Ўжо колькі тысяч год стаіць магіла:\\
Ў гаршку насення жменю там знайшлі.\\
\\
Хоць зернейкі засохшымі былі,\\
Усё ж такі жыццёвая іх сіла\\
Збудзілася, і буйна ўскаласіла\\
Парой вясенняй збожжа на раллі.\\
\\
Вось сімвал твой, забыты краю родны!\\
Зварушаны нарэшце дух народны,\\
Я верую, бясплодна не засне,\\
\\
А ўперад рынецца, маўляў крыніца,\\
Каторая магутна, гучна мкне,\\
Здалеўшы з глебы на прастор прабіцца.

 


===== Падобныя старонкі =====
  * [[слоўнік/вянок-санетаў]]
  * [[творы/уладзімір-жылка/уладзімір-жылка-меч]]
  * [[слоўнік/санет]]
  * [[творы/максім-багдановіч/максім-багдановіч-санет-замёрзла-ноччу-ш]]
  * [[творы/янка-купала/янка-купала-для-зямлі-прадзедаў-маіх]]