~~META:
title = Максім Багдановіч — Пагоня
&keywords = разбіць, пагоні, літоўскай, спыніць, стрымаць, бійце, коні, старадаўняй, сэрцы, лятуць
&abstract = Чытаць верш Максіма Багдановіча "Пагоня"
&iftrue = nan
~~

====== Максім Багдановіч — Пагоня ======
Толькі ў сэрцы трывожным пачую\\
За краіну радзімую жах, –\\
Ўспомню Вострую Браму святую\\
I ваякаў па грозных канях.\\
\\
Ў белай пене праносяцца коні, —\\
Рвуцца, мкнуцца і цяжка хрыпяць...\\
Старадаўняй Літоўскай Пагоні\\
Не разбіць, не спыніць, не стрымаць.\\
\\
У бязмерную даль вы ляціце,\\
А за вамі, прад вамі – гады.\\
Вы за кім у пагоню спяшыце?\\
Дзе шляхі вашы йдуць і куды?\\
\\
Мо яны, Беларусь, панясліся\\
За тваімі дзяцьмі уздагон,\\
Што забылі цябе, адракліся,\\
Прадалі і аддалі ў палон?\\
\\
Бійце ў сэрцы іх – бійце мячамі,\\
Не давайце чужынцамі быць!\\
Хай пачуюць, як сэрца начамі\\
Аб радзімай старонцы баліць...\\
\\
Маці родная, Маці-Краіна!\\
Не усцішыцца гэтакі боль...\\
Ты прабач, Ты прымі свайго сына,\\
За Цябе яму ўмерці дазволь!..\\
\\
Ўсё лятуць і лятуць тыя коні,\\
Срэбнай збруяй далёка грымяць...\\
Старадаўняй Літоўскай Пагоні\\
Не разбіць, не спыніць, не стрымаць.

\\


 


===== Падобныя старонкі =====
  * [[творы/уладзімір-жылка/уладзімір-жылка-покліч]]
  * [[творы/артур-вольскі/артур-вольскі-пагоня]]
  * [[творы/іван-пташнікаў/іван-пташнікаў-пагоня]]
  * [[творы/васіль-зуёнак/васіль-зуёнак-у-люстэрку-свіцязі]]
  * [[творы/алесь-бадак/алесь-бадак-пагоня]]