~~META:
title = Максім Багдановіч — Мяжы
&keywords = Багдановіч, Мяжы
&abstract = Чытаць верш Максіма Багдановіча "Мяжы"
&iftrue = nan
~~

====== Максім Багдановіч — Мяжы ======
Кінь вокам на увесь абшар зямлі:\\
Вось хату шчыльна абышлі\\
Парканы з гострымі цвікамі,\\
Пасыпаныя бітым шклом,\\
Глядзі — ў прасторах за сялом\\
Мяжамі\\
Падзелены на нівах каласы,\\
Ідуць канаўкі праз лясы,\\
I стопудовыя гранічныя каменні\\
Сярод лугоў бяскрайніх заляглі.\\
Шнуры штыкоў па ўсёй зямлі\\
Гараць, як дзікае хаценне,\\
На гасударстваў рубяжы.\\
Глядзі: паўсюль мяжы.\\
\\
Нязмерны вольныя прасторы\\
Святой зямлі, — а чалавек\\
Мяжы, ірвы, тыны рабіў за векам век.\\
Хаваўся ў іх, як ліс у норы,\\
I жыў пужліва сам — адзін,\\
Дрыжачы, як лісцё асін,\\
Зласлівы, бессардэчны, хцівы,\\
Такі здрадлівы,\\
Для ўсіх чужы, зусім чужы.\\
Вакол яго — платы, мяжы.\\
Пабач, што робіцца за гэтымі платамі!\\
У надмернай працы гіне тут\\
Галодны і абдзёрты люд,\\
Каторы моцнымі рукамі\\
Стварыў усе багацтвы на зямлі:\\
Правёў ён скібы на раллі,\\
Ён рэйкі пралажыў чыгунак,\\
Заводаў коміны падняў у выш нябёс,\\
A сам даўно сляпы ад слёз\\
I ўжо забыўся аб ратунак.\\
Глядзі: па ўсёй зямлі святой\\
Шырокай хваляй залатой\\
Без краю блішча збожжа мора,\\
Цвітуць лугі, шумяць лясы...\\
Так многа ёсць паўсюль багацтва і красы,\\
A людзі нішчацца у голадзе, у зморы\\
Ад беднаты, ад цемнаты,\\
Бо скрозь — мяжы, бо скрозь — платы.

 


===== Падобныя старонкі =====
  * [[творы/максім-багдановіч/патрыятычная-лірыка-максіма-багдановіча]]
  * [[творы/максім-багдановіч/максім-багдановіч-маёвая-песня]]
  * [[творы/максім-багдановіч/максім-багдановіч-вадзянік]]
  * [[творы/максім-багдановіч/творчасць-максіма-багдановіча]]
  * [[творы/максім-багдановіч/максім-багдановіч-страцім-лебедзь]]