~~META:
title = Леанід Дранько-Майсюк — Прыгажосць
&keywords = прыгажосць
&abstract = Чытаць верш Леаніда Дранько-Майсюка "Прыгажосць"
&iftrue = nan
~~

====== Леанід Дранько-Майсюк — Прыгажосць ======
Табе пярэчу, прыгажосць.\\
Наканавана мне пярэчыць\\
І з галавы да ног наскрозь\\
Працятым быць нязгодай вечнай.\\
\\
Цябе прыняць такой, яе ёсць,\\
Адной табе ў жыцці маліцца\\
Не маю сілы, прыгажосць,\\
Не здатны я табе скарыцца.\\
\\
Я – тут, а ты, вядома, скрозь,\\
Я шмат не разумею рэчаў,\\
Але я ўцяміў, прыгажосць,\\
Адно – штодзень табе пярэчыць.\\
\\
Не адмаўляць цябе, крый бог,\\
Не абмінаць цябе ніколі,\\
Не абражаць, як хтосьці б мог, -\\
Пярэчыць толькі, і не болей.\\
\\
О так – ты выратуеш свет,\\
Ты мову нашую ўратуеш,\\
І не адзін яшчэ паэт\\
У рыцарах тваіх звякуе.\\
\\
Усюдыісную тваю\\
Уславіць велічнасць ад сэрца,\\
А мне праз глухату сваю\\
Ізноў пярэчыць давядзецца.\\
\\
Прабач, я дрэнны служка твой,\\
А лепшым стаць не выпадала –\\
З маёй пачварнаю душой,\\
З маёй душой недасканалай.

 


===== Падобныя старонкі =====
  * [[творы/пятрусь-броўка/пятрусь-броўка-красаванне]]
  * [[творы/леанід-дранько-майсюк/леанід-дранько-майсюк-мне-шчасце-дадзена]]
  * [[ibdc.ped>прыгажосць-роднай-зямлі]]
  * [[творы/леанід-дранько-майсюк/творчасць-леаніда-дранько-майсюка]]
  * [[ibdc.ped>жамчужына-беларускага-паазер-я]]