~~META:
title = Леанід Дайнека — Дрыгавічы
&keywords = Дайнека, дрыгавічы
&abstract = Чытаць верш Леаніда Дайнекі "Дрыгавічы"
&iftrue = nan
~~

====== Леанід Дайнека — Дрыгавічы ======
//Аляксею Пятрухну//

Дрыгавічы — лясныя людзі.\\
Сыны вады. Сыны зары.\\
Шляхоў назад мне больш не будзе —\\
Я тут кідаю якары.\\
Бяжыць рака ў трыснёг зялёны.\\
Бліскоча месяц уначы.\\
То позірк ваш, пагляд бяссонны,\\
Дрыгавічы.\\
На сцежках веку навальнічных\\
Я чую ваш зазыўны кліч,\\
Бо я дзіця лясоў, язычнік,\\
Бо я таксама дрыгавіч.\\
Назло захопніку-забойцу\\
Вы ўмелі родны край любіць,\\
I сеяць хлеб, і ладзіць борці,\\
I на дубовым чоўне плыць.\\
Калі ж было чужынцу мала\\
Зямлі, паветра і вады,\\
Сцяной нязломнай вы ўздымалі\\
Свае чырвоныя шчыты.\\
Дрыгва ваш след не праглынула.\\
Мы чуем вашы галасы,\\
Калі з гарачым свістам, гулам\\
Віхор суровы гне лясы.\\
Калі ж метал зазвоніць строга,\\
Палезе звер у родны кут,\\
Мы вас паклічам на падмогу,\\
I вы адкажаце: «Мы тут!»\\
Няхай удалеч дні імчацца —\\
З крыніцы вашай будзем піць.\\
Бярозка, як дрыгавічанка,\\
Над той крыніцаю стаіць.

 


===== Падобныя старонкі =====
  * [[творы/леанід-дайнека/леанід-дайнека-вячка-1224-год]]
  * [[творы/леанід-дайнека/творчасць-леаніда-дайнекі]]
  * [[творы/леанід-дайнека/леанід-дайнека-жалезныя-жалуды]]
  * [[творы/леанід-дайнека/леанід-дайнека-меч-князя-вячкі]]
  * [[творы/леанід-дайнека/леанід-дайнека-след-ваўкалака]]