~~META:
title = Леанід Галубовіч — Мова
&keywords = Галубовіч, мова
&abstract = Чытаць верш "Мова" Леаніда Галубовіча
&iftrue = nan
~~

====== Леанід Галубовіч — Мова ======
У гадах, якіх не дагукацца,\\
На роднай мове размаўляць\\
Было прывольней і, прызнацца,\\
Не трэ было сябе хаваць,\\
\\
Што беларус, што родам з вёскі,\\
Што ў старане сваёй не госць,\\
Што ў белым свеце адгалоскі\\
Тваёй Айчыны роднай ёсць.\\
\\
Што ёсць Купала, ёсць Дубоўка,\\
Што ёсць Гарэцкі і Чарот,\\
I што равесніца-сяброўка\\
Народнай песняй кругліць рот...\\
\\
Не раз «деревнею» і«лаптем»\\
Смяшылі ў душных гарадах...\\
За ўсё, за ўсё яшчэ заплацім\\
Душой, з якою не ў ладах.\\
\\
А сёння вось і ў роднай вёсцы\\
З радзімай мовай нелады.\\
I ёй ужо не маю моцы\\
Я дагукацца маладых.\\
\\
Загавару.

Пайду на споведзь.

I ўслед пачую дзіўны зык:\\
«Ишь, образованный какой ведь!\\
Как изучил родной язык!»\\
\\
Не ад былой баліць пасмешкі —\\
Ад гэтай дзікай пахвалы.\\
Ў адну дарогу звесці сцежкі\\
Ў вялікі свет — скрозь свет малы!\\
\\
О, мова!

Усе, як магеланы,

К табе мы вернемся наўпрост,\\
Каб ты знайсці дапамагла нам\\
I ДОМ,

і МАЦІ,

і ПАГОСТ...

 


===== Падобныя старонкі =====
  * [[слоўнік/вершаваная-мова]]
  * [[слоўнік/літаратурная-мова]]
  * [[слоўнік/аўтарская-мова]]
  * [[слоўнік/няўласна-простая-мова]]
  * [[слоўнік/мова-мастацкай-літаратуры]]