~~META:
title = Ларыса Геніюш — Мы – народ
&keywords = праўда, народ, душа, душы
&abstract = Чытаць верш Ларысы Геніюш "Мы – народ"
&iftrue = nan
~~

====== Ларыса Геніюш — Мы – народ ======
Агонь душы не паканаюць сцюжы.\\
Марозамі агню не пагасіць.\\
З цярпенняў – веліч, як на цернях – ружы...\\
I з болю родзіцца дзіця, каб жыць.\\
\\
Адважна лёсу камяні ўспрымаю.\\
Баліць душа, але ў душы спакой.\\
Пячэ душа агнём, але стрываю,\\
не перашкодзяць раны выйсці ў бой.\\
\\
Не быць начы! Няма жыцця без сонца,\\
яно узыдзе, азарыць акно.\\
Мана хлуслівых страціць абаронцаў\\
і волавам апусціцца на дно.\\
\\
А праўда – то не кліч, штыком падпёрты,\\
прыгодны злыдням для нячыстых спраў.\\
А праўда – з лёсаў, з душ, з народных нетраў,\\
з цярпення, што народ ператрываў.\\
\\
Ліхой хлусні бяссільны крык варожы.\\
Да дзён прыгону страшны паварот.\\
А праўда ўсё ж жыве і пераможа!\\
Мы вам не слугаў племя –

мы народ!

 


===== Падобныя старонкі =====
  * [[творы/юрась-свірка/юрась-свірка-верны-крэўнаму-брацтву]]
  * [[творы/якуб-колас/служэнне-народу-асноўны-абавязак-мастака]]
  * [[ibdc.ped>душа-народа]]
  * [[творы/васіль-зуёнак/васіль-зуёнак-будучыня]]
  * [[творы/якуб-колас/якуб-колас-народ-у-трылогіі-на-ростанях-]]