~~META:
title = Ларыса Геніюш — Крывёй напоўніліся поймы рэк...
&keywords = Геніюш, поймы, рэкі
&abstract = Чытаць верш Ларысы Геніюш "Крывёй напоўніліся поймы рэк..."
&iftrue = nan
~~

====== Ларыса Геніюш — Крывёй напоўніліся поймы рэк... ======
Крывёй напоўніліся поймы рэк,\\
бурліць адчаем слёз людскіх разводздзе.\\
Гляджу на свет. Я – лагернік, я – зэк,\\
засуджаны на мукаў чвэрцьстагодздзя.\\
\\
Мяне драты, сабакі сцерагуць,\\
дзікіх надзораў зграя нада мною,\\
і лоб штодня мой на прыцэл бяруць\\
навучаныя забіваць канвоі.\\
\\
Мне ўсё ўзялі, разбурылі сям’ю,\\
кіркой прабілі лёс мой чалавечы,\\
ланцуг накінулі на шыю салаўю\\
і між сабою падзялілі рэчы.\\
\\
Натоўп дзяўчат, жанчын, яшчэ жывых,\\
йдзем зледзянелай тундры каляінай,\\
папраз снягі, мароз сцінае дых,\\
мароз шукае песні салаўінай.\\
\\
Канвой яе шукае і надзор,\\
я йду пургой, завеяная снегам,\\
гляджу ваўком ўсёй дзікасці ў дакор,\\
не, маю душу прашманаць ім нельга!\\
\\
На вуснах песня, мой апошні дых,\\
цяплом з-пад сэрца словы саграваю,\\
жывая я яшчэ сярод жывых,\\
ў душы маёй і Беларусь жывая!

 


===== Падобныя старонкі =====
  * [[творы/ларыса-геніюш/ларыса-геніюш-зіма-мароз-кусаецца]]
  * [[творы/ларыса-геніюш/ларыса-геніюш-вясковы-дом]]
  * [[творы/ларыса-геніюш/ларыса-геніюш-аблокі]]
  * [[творы/ларыса-геніюш/ларыса-геніюш-зіма]]
  * [[творы/ларыса-геніюш/творчасць-ларысы-геніюш]]