~~META:
title = Ларыса Геніюш — Зіма
&keywords = Геніюш, зіма
&abstract = Чытаць верш "Зіма" Ларысы Геніюш
&iftrue = nan
~~

====== Ларыса Геніюш — Зіма ======
Мінулі дні асенняй, бурай слякаці,\\
падмёрзлы грунт завалакло сняжком.\\
Такая рань, што хочацца расплакацца\\
насустрач сонцу й лёгкім аблаком.\\
\\
Уквеціў шэрань голлі непакрытыя,\\
за ночку стрэхі снегам падбяліў,\\
як быццам нечасаную, нямытую\\
сялібу нашу нехта палюбіў.\\
\\
Я ў цёплай хусце выбегла на ганачак,\\
на вуснах смех, такі нячасты госць.\\
Бязмэтна неяк выглядаю саначак,\\
якімі адзвінела маладосць.\\
\\
А тая даль паўзе-гудзе машынамі,\\
праезджым экскаватарам раве,\\
і гасне маладосць мая шыпшынная,\\
як светлы дзень ў вячэрняй сіняве.\\
\\
Што ж, маладосць усім здаецца казачнай.\\
Вось і мая: у полі ля сяла\\
праехала пад звоначкі на саначках,\\
па росных межах басанож прайшла.\\
\\
Ляцець бы так санямі параконнымі\\
ля сонных хатаў, ля дарожных вех,\\
каб даль звінела вокал галагонамі,\\
а з-пад капытаў разлятаўся снег.\\
\\
Сялянскі нораў, кроў мая мужыцкая\\
да коней сэрцам цягне, да сяла.\\
Жыву даўно забытымі прывычкамі...\\
Што ж, маладосць сярод палёў прайшла.

 


===== Падобныя старонкі =====
  * [[ibdc.ped>зімой-у-лесе]]
  * [[творы/цішка-гартны/цішка-гартны-зімовы-вечар]]
  * [[творы/кастусь-жук/кастусь-жук-снежань]]
  * [[творы/ларыса-геніюш/ларыса-геніюш-на-каньках]]
  * [[творы/кастусь-жук/кастусь-жук-беларуская-зіма]]