~~META:
title = Ларыса Геніюш — За прасніцай
&keywords = белыя, сонца, гарыць, нітка, прасніцы, кашулі
&abstract = Чытаць верш Ларысы Геніюш "За прасніцай"
&iftrue = nan
~~

====== Ларыса Геніюш — За прасніцай ======
Калаўротак бурчыць сваю песню\\
пасівелых, далёкіх нам дзён.\\
З праллі пальцамі спевам ён песціць\\
залацісты на прасніцы лён.\\
\\
Навіваецца нітка на шпулю\\
із пад рук уцякаючы ў міг.\\
З яе белыя будуць кашулі,\\
будзе тонкі, узорны ручнік.\\
\\
Ды палотнаў сцягі снегавыя\\
забялеюць на сонцы вясною,\\
зелень свежую цвет як пакрые\\
і чаромуху ў вэлюм прыстрое.\\
\\
Калі воблакам рожава-белым\\
ахінецца сад цвету імглой,\\
а дзяўчына затужыць нясмела\\
аб каханні расцвіўшай вясной.\\
\\
Снежна белыя будуць кашулі,\\
ды бялей за чаромухі бель,\\
за галоўку старое бабулі\\
і як яснага сонца пасцель.\\
\\
– Як полаз, як колас, як волас,\\
ты, унучанька, нітку прадзеш...\\
Вечарамі накш пралі мы колісь\\
пры лучыне, на верацяне...\\
\\
Так бабулька хаця дакарае,\\
але радасць у твары гарыць,\\
бо ўнучкіна нітка такая,\\
што танчэйшай не можа і быць.\\
\\
Залаціцца кудзеля на прасніцы,\\
гарыць сонца ў касе залатой.\\
Пра палотны, пра долю, пра шчасце\\
плывуць думкі за ніткай даўгой.\\
\\
1935

 


===== Падобныя старонкі =====
  * [[творы/ларыса-геніюш/ларыса-геніюш-зіма]]
  * [[творы/ларыса-геніюш/ларыса-геніюш-зіма-мароз-кусаецца]]
  * [[творы/ларыса-геніюш/ларыса-геніюш-вясковы-дом]]
  * [[творы/ларыса-геніюш/ларыса-геніюш-аблокі]]
  * [[творы/ларыса-геніюш/творчасць-ларысы-геніюш]]