~~META:
title = Ларыса Геніюш — Адказ
&keywords = слава, хочам, горды
&abstract = Верш Ларысы Геніюш "Адказ"
&iftrue = nan
~~

====== Ларыса Геніюш — Адказ ======
– Скажы, скуль ты, хлопча?\\
– З зямлі беларускай –\\
стуль, дзе льецца Нёман\\
мігатлівай стужкай.\\
\\
Дзе лугі буйныя,\\
ураджайны землі,\\
дзе старыя вербы\\
ля гасцінцаў дрэмлюць.\\
\\
Дзе лясы як ў казцы –\\
ўсё з дубоў адвечных;\\
дзе у нетры пушчаў\\
глянуць небяспечна.\\
\\
Я з краіны слаўнай,\\
з гарадоў прыгожых,\\
што не зналі колісь\\
цьмы чужой, варожай.\\
\\
Родны сцяг наш горда\\
уздымаўся ў гору\\
ад балтыйскіх хваляў\\
аж па Чорна Мора!\\
\\
Ў маім краі казкі,\\
сівыя курганы;\\
там зрадзілась песня\\
вешчага Баяна.\\
\\
Выпілі вякі ўжо,\\
нат з Нямігі воду –\\
славу нашых продкаў\\
засланіла воддаль.\\
\\
Але, ўсё ж, я горды\\
нашых сэрцаў сілай –\\
мы падымем славу\\
з курганоў-магілаў.\\
\\
Бо мы хочам волі\\
горача і цвёрда,\\
бо мы хочам славы\\
для Пагоні гордай!

 


===== Падобныя старонкі =====
  * [[творы/ларыса-геніюш/ларыса-геніюш-зіма]]
  * [[творы/ларыса-геніюш/ларыса-геніюш-аблокі]]
  * [[творы/ларыса-геніюш/творчасць-ларысы-геніюш]]
  * [[творы/ларыса-геніюш/ларыса-геніюш-вясковы-дом]]
  * [[творы/ларыса-геніюш/ларыса-геніюш-зіма-мароз-кусаецца]]