~~META:
title = Клаўдзія Каліна — Снежань
&keywords = снежань, заяц, мука, зямлю, цеста, палі, прыедзе, мукі, белаю, сыпле, блінцоў, лясной, крыніцы, кажушкі
&abstract = Апавяданне Клаўдзіі Каліны "Снежань"
&iftrue = nan
~~

====== Клаўдзія Каліна — Снежань ======
Ці ведаеце вы, хто такі Снежань? Не? Дык я вам скажу. Снежань – млынар. Ёсць у яго на далёкай поўначы чарадзейны млын, які ўдзень і ўначы меле бялюткую муку.\\
Снежань тую муку возіць і высявае на палі, лугі, лясы…\\
Прыедзе, агледзіць голыя палі, дрэвы, кусты.\\
– Эхэ-хэ! – кажа. – Трэба тут парадак навесці. – І ледзь цягне вялізны мех мукі дый высыпае на зямлю.\\
Цёпла робіцца зямельцы пад пышнаю белаю коўдрай. А Снежань сыпле і сыпле муку, пакуль не выбеліць ёю ўсю зямлю.\\
– Цяпер добра было б яшчэ і блінцоў напячы, падсілкавацца, – кажа, вытрасаючы з мяхоў у крыніцу рэшткі мукі.\\
Замясіў Снежань цеста ў лясной крыніцы. І толькі сабраўся блінцы пячы, як чуе: нехта галосіць у лесе. Бачыць, бягуць зайцы, спалашыліся, крычаць:\\
– Бедныя мы, зайцы! Што нам рабіць? Дзе схавацца?\\
Усюды ўсё белае, а мы засталіся шэрыя. Нас руды ліс падсцерагае, паляўнічы страляе.\\
– Не бядуйце, зайцы! – гукнуў ім Снежань. – Ідзіце да мяне, я вам памагу.\\
Схапіў Снежань зайцоў за іх доўгія вушы і – боўць у цеста. Выцягнуў, глядзіць, а зайцы сталі белыя- бялюткія. Толькі на кончыках вушэй, за якія трымаў іх Снежань, засталіся ў зайцоў маленькія цёмныя лапінкі. Але гэта не бяда…\\
Зарадаваліся зайцы, падзякавалі Снежню за тое, што перафарбаваў іх кажушкі, і паскакалі ў лес.\\
З тых даўніх часоў так і павялося. Прыедзе на сваіх сярэбраных санях Снежань, пасыпле белаю мукою зямлю, замесіць у лясной крыніцы цеста, каб напячы блінцоў. І адразу чуе: бягуць па лесе спалоханыя зайцы, крычаць.\\
І пачынае Снежань бяліць зайчыкавы кажушкі…

 


===== Падобныя старонкі =====
  * [[ibdc.ped>галінка-каліны-ў-лётным-планшэце]]
  * [[творы/янка-купала/янка-купала-явар-і-каліна]]
  * [[творы/мікола-чарняўскі/мікола-чарняўскі-снежань]]
  * [[творы/клаўдзія-каліна/клаўдзія-каліна-у-студзеньскую-ноч]]
  * [[творы/кастусь-жук/кастусь-жук-снежань]]