~~META:
title = Клаўдзія Каліна — Кастрычнік
&keywords = павучкі, кужалёк, даль, кастрычнік, лён, ляціць, кужаль, замаразкі, лянок
&abstract = Апавяданне Клаўдзіі Каліны "Кастрычнік"
&iftrue = nan
~~

====== Клаўдзія Каліна — Кастрычнік ======
Трэ Кастрычнік лён, аж кастрыца ляціць стаўбом. Спяшаецца ён да замаразкаў кужаль выткаць і вопратку сабе пашыць. Пачулі пра замаразкі павучкі і напалохаліся.\\
– Ой, што нам рабіць? – пачалі бедаваць. – Замерзнем мы ў замаразкі, загінем без вопраткі.\\
І пайшлі павучкі да Кастрычніка, каб той навучыў іх ткаць кужаль.\\
– Добра, навучу, – згадзіўся Кастрычнік і даў кожнаму павучочку льну па снапочку.\\
– Перш-наперш гэты лянок трэба вымачыць, потым высушыць, затым пацерці... – навучаў ён павучкоў, – далей трэба лянок вытрапаць і вычасаць, кудзелечку скласці і танюсенька спрасці. Нітачкі тыя ў аснову на кросенкі навіць. Нарэшце нітачку ў чаўнок – і тчыце сабе кужалёк!\\
Падзякавалі павучкі Кастрычніку і ўзяліся за работу. Прадуць павучкі кужалёк, а што далей з ім рабіць, забыліся. Адны кажуць: «Трэба зноўку кужалёк мачыць!» Другія пярэчаць: «Трэба сушыць». Трэція крычаць: «Трэба часаць». А да ладу не могуць дайсці.\\
Так кожненькі год і спрачаюцца паміж сабою павучкі. Напрадуць нітачак, цягнуць іх па зямлі і не ведаюць, што далей з імі рабіць. І ляціць разам з павучкамі над палямі беленькі кужалёк – бабіна лета.\\
Паглядзіце ў кастрычніку на палі, лугі, лясы... Колькі таго серабрыстага кужалю павучкі напралі!

 


===== Падобныя старонкі =====
  * [[творы/мікола-чарняўскі/мікола-чарняўскі-кастрычнік]]
  * [[творы/янка-купала/янка-купала-явар-і-каліна]]
  * [[творы/авяр-ян-дзеружынскі/авяр-ян-дзеружынскі-кастрычнік]]
  * [[творы/клаўдзія-каліна/клаўдзія-каліна-у-студзеньскую-ноч]]
  * [[ibdc.ped>кастрычнік]]