~~META:
title = Клаўдзія Каліна — Жнівень
&keywords = перапёлка  спаць  паспела   жнівень  пагубляла  клікала  гняздо жыта  жаць  дзяцей, пшаніцу, пырхнула, ячмень
&abstract = Апавяданне Клаўдзіі Каліны "Жнівень"
&iftrue = nan
~~

====== Клаўдзія Каліна — Жнівень ======
Бяда перапёлцы ў жніўні. У жніўні сярпы звіняць, камбайны гудуць, снапы покатам кладуцца… А беднай перапёлцы нідзе прытулку няма. Не паспела яна ў жыце гняздо звіць, птушанят падгадаваць, як Жнівень ужо гукае:

Час адгэтуль вылятаць –\\
Пачынаю жыта жаць.

Ледзь уцякла перапёлка з жыта. Дзяцей ад страху пагубляла… Доўга пасля клікала іх: «Спаць пара! Спаць пара!» А калі сабрала, павяла хуценька ў пшаніцу.\\
– Тут зраблю гняздзечка, – кажа сваім дзеткам перапёлка.\\
Толькі паспела месца выбраць, як Жнівень зноў загукаў:

Пакідай сваю святліцу –\\
Пачынаю жаць пшаніцу!

Пырхнула перапёлка ў ячмень. Зноў дзяцей пагубляла. Доўга шукала і клікала: «Спаць пара! Спаць пара!» Знайшоўшы, павяла ў ячмень:\\
– Тут нас ніхто не патурбуе!\\
Але раптам над самаю яе галавою зазвінела каса…\\
– Вылятай, перапёлка! – пачуўся голас Жніўня.\\
Спалохалася перапёлка і наўцёкі… Зноў дзетак пагубляла. Доўга клікала: «Спаць пара! Спаць пара!» Даклікалася і пайшла ў аўсы. Але не паспела і аснаваць гняздо, як пачула: «Вылятай, перапёлка!»\\
Перапалохалася, бедная, сіганула ў проса, адтуль у грэчку. Нарэшце ў бульбу, а Жнівень – за ёю. «Вылятай, перапёлка! Вылятай!» – усюды чуецца яго голас.\\
Пырхнула перапёлка на агароды, а за ёю – дзетак чароды. Паляцела яна над лугам, а за ёю – птушаняты цугам.\\
Акрыялі, падужэлі яе дзеткі ад тых пералётаў. Памацнелі ў іх крылцы, паспрытнелі ножкі. Не агледзелася перапёлка, як дзеткі яе выраслі.\\
А тут ужо канчаецца лета цёплае, пара ў вырай збірацца.\\
Сабрала перапёлка сваю вялікую сям’ю і паляцела зімаваць у вырай.

 


===== Падобныя старонкі =====
  * [[ibdc.ped>птушкі-шчасця]]
  * [[творы/янка-брыль/увесь-свет-адзін-дом-па-раману-янкі-брыл]]
  * [[творы/янка-брыль/раман-янкі-брыля-птушкі-і-гнёзды-вобраз-]]
  * [[творы/янка-брыль/птушкі-i-гнёзды-гнёзды-за-дымам-аповесць]]
  * [[творы/янка-брыль/птушкі-i-гнёзды-сцюдзёны-вырай-аповесць-]]