~~META:
title = Кастусь Жук — Шпак купіў магнітафон
&keywords = шпак, сад, шчыглу, салавей, нотаў, песню, пець, сон, купіў, магнітафон
&abstract = Чытаць верш Кастуся Жука "Шпак купіў магнітафон"
&iftrue = nan
~~

====== Кастусь Жук — Шпак купіў магнітафон ======
Мне прысніўся дзіўны сон:\\
Шпак купіў магнітафон.\\
Ён, усеўшыся на грушу,\\
Інтэрв’ю бярэ у птушак:\\
– Адкажы мне, ды жвавей,\\
Што спяеш нам, салавей?\\
Ці прыпеўкі, ці раманс?\\
Стаць славутым маеш шанс.\\
\\
Салавей сумеўся:\\
– Што вы?\\
Сёння пець я не гатовы.\\
Паспяваў бы я ў ахвоту,\\
Ды не ўзяў з сабою нотаў.\\
\\
– Ты што скажаш, верабей?\\
– Пець шчыглу – куды прасцей:\\
Ён без нотаў зацягнуць\\
Можа песню пра вясну.\\
– А што думаюць удоды?\\
– Падпяваць шчыглу мы згодны.\\
– Вось і добра!\\
Мы ж усе\\
Вам паможам пакрысе.\\
\\
Шчоўкнуў шпак магнітафонам –\\
I азваўся сад зялёны\\
Галасамі вераб’я,\\
I шчыгла, і салаўя.\\
\\
Нават жаваранак з неба\\
Звонка падцягнуў, як трэба,\\
Аж пусціліся у скокі\\
Тры сініцы, дзве сарокі.\\
\\
З лесу чорны дрозд паспешна\\
Прыляцеў паслухаць песню,\\
Не ўтрымаўся – свіснуў сам.\\
Вольна ўсім тут галасам!..\\
\\
Я прачнуўся. Сад звінеў:\\
Кожны птах на дрэве пеў.\\
Зразумеў я: то не сон –\\
Шпак купіў магнітафон.

 


===== Падобныя старонкі =====
  * [[творы/генадзь-бураўкін/генадзь-бураўкін-шпак-спявае]]
  * [[ibdc.ped>шпак]]
  * [[творы/янка-журба/янка-журба-шпак]]
  * [[творы/яўген-крупенька/яўген-крупенька-шпак]]
  * [[ibdc.ped>бясхвосты-шпак]]