~~META:
title = Кастусь Жук — Францішку Скарыне
&keywords = кнігі, добры, гады, прага, дзень
&abstract = Чытаць верш Кастуся Жука "Францішку Скарыне"
&iftrue = nan
~~

====== Кастусь Жук — Францішку Скарыне ======
Далёкіх часоў успаміны,\\
Твой воблік світае ў прасторы...\\
– Дзень добры, Францішак Скарына,\\
Памкненням светлым дзень добры!\\
\\
Ты сэрцам прачулым і вешчым\\
Клікаў народ на сустрэчу\\
Са словам яго, чалавечым,\\
Якому суджана вечнасць.\\
\\
Вайну абвясціўшы цемры,\\
Невуцтву

ў краі родным, –

Да ведаў ішоў ты цераз\\
Замежных дзяржаў вароты.\\
\\
Хіліла да кнігі – прага,\\
Перад народам павіннасць.\\
З табой віталася – Прага,\\
Чырванабровая Вільня.\\
\\
Гляджу

праз гады нябыту

Туды, дзе ты ўзважваў пралікі,\\
Карпеў, бакалаўр знакаміты,\\
Тварыў, доктар вялікі, –\\
\\
Стаіш

ля раскрыленай кнігі,

Свае запаволіўшы рухі...\\
. . . . . . . . . . .\\
Сплываюць гады, як крыгі,\\
Нашчадак быліннай Нямігі, –\\
Чытаю твае першадрукі.\\
\\


Крыніца: Жук К. Зямная ноша: Вершы і паэма. – Мн.: Маст. літ., 1988. – 118 с.

 


===== Падобныя старонкі =====
  * [[творы/іншае/францыск-скарына-з-прадмовы-да-кнігі-юдз]]
  * [[ibdc.ped>мастацкая-скарыніяна]]
  * [[ibdc.ped>эпоха-францыска-скарыны]]
  * [[ibdc.ped>спадчына-скарыны]]
  * [[ibdc.ped>францыск-скарына]]