~~META:
title = Карусь Каганец — Наш покліч
&keywords = Каганец, покліч
&abstract = Чытаць верш "Наш покліч" Каруся Каганца
&iftrue = nan
~~

====== Карусь Каганец — Наш покліч ======
Штось Нёман наш ціхі прачнуўся,\\
У пасцелі сваёй спеляхнуўся\\
I хвальку за хвалькай ціхенька пагнаў,\\
Ад краю да краю ганцоў ён паслаў,

Ад рэчкі да рэчкі,\\
Уздоўж і папярэчкі\\
У Шчару, у Сулу,\\
У Лошу і Вусу-раку.

Гэй, мы, хлопцы-наднямонцы,\\
Гукнем разам, гукнем разам:

— О — гоў!

Ой, не адзін Нёман прачнуўся,\\
Бо і час чагось пахітнуўся,\\
I вецер, сарваўшысь, лісцем зашумеў\\
Ды па полі і луках ён паляцеў —

Колас к зямлі прыгне,\\
Кветку красну сарве,\\
Птушку пабудзе.\\
Ой, на свеце штось будзе!

Гэй, мы, хлопцы-наднямонцы,\\
Гукнем разам, гукнем разам:

— О — гоў!

Прачнуўся і наш наднямонец:\\
Молад і стар, мужык і хлопец.\\
Ой, старшыя чагось зварухнуліся,\\
Як бы бяды якой спалахнуліся.

Ой, друг к дружку ідзе\\
I суседа вядзе,\\
Люлек не кураць,\\
Знаць, штось важнае судзяць.

Гэй, мы, хлопцы-наднямонцы,\\
Гукнем разам, гукнем разам:

— О — гоў!

Ой, гора жа, гора над намі,\\
А ўсяму вінаваты самі,\\
Бо мову прыродну мы забываем,\\
Апратку, звычай на чужы мяняем.

Гэй, да схамянемась,\\
Да са сну прачнемась!\\
Згоду ўраім,\\
Што е злога — паправім!

Гэй, мы, хлопцы-наднямонцы,\\
Гукнем разам, гукнем разам:

— О — гоў!

 


===== Падобныя старонкі =====
  * [[творы/уладзімір-жылка/уладзімір-жылка-покліч]]
  * [[творы/карусь-каганец/карусь-каганец-прылукі]]
  * [[творы/карусь-каганец/карусь-каганец-скрыпач-і-ваўкі]]
  * [[творы/карусь-каганец/карусь-каганец-модны-шляхцюк]]
  * [[творы/карусь-каганец/карусь-каганец-парада]]