~~META:
title = Кандрат Крапіва — Сава, Асёл ды Сонца
&keywords = сава, асёл, сонца
&abstract = Чытаць байку Кандрата Крапівы "Сава, Асёл ды Сонца"
&iftrue = nan
~~

====== Кандрат Крапіва — Сава, Асёл ды Сонца ======
Сава лятала паначы,\\
З сабою птушкам смерць насіла,\\
Хаўтурны спеў ім пеючы, –

Сама там драла іх, сама ж і галасіла,\\
Ды так не ўбачыла, як нахапіўся дзень,

I Сонца яркага прамень\\
Да рэшты асляпіў ёй вочы.\\
Сава ўцячы тут хоча,\\
Ды толькі вось ляцець не можа,\\
А поблізу няма дупла нідзе.\\
Заплакала Сава ў бядзе –\\
Ну, хто ж Саве паможа?\\
На шчасце ёй тут лёс паслаў

Знаёмага Асла.

I кажа ён: – Не плач, сястрыца,

Ды надта не бядуй,–

З бяды мы вырабімся самі,

I Сонцу нам не прыйдзецца скарыцца:\\
Я вушы доўгія на Сонца навяду

I засланю яго вушамі.

Як цемра ўсю пакрые галу,\\
Як згіне прыкрае святло,\\
Дык ты й ляці сабе ў дупло

Тады памалу.

I наш Асёл за працу ўзяўся шчыра:

Як можна вушы свае шырай\\
Ён растапырыў, распрастаў

I проці Сонца стаў.

Калі ж налева глянуў коса –\\
Святла там яркая палоса.

Ён – гоп у левы бок.

Пасля глядзіць – святло і справа;

Тады назад ён – скок.

Нарэшце бачыць – дрэнна справа:\\
Скакаў, скакаў і ўжо насілу ходзіць,

А Сонцу ўсё ніяк не шкодзіць, –

Ні каплі не памог Саве,\\
А вочы пасляпіў сабе.

I вось Аслу нарэшце ясна стала:

Каб Сонца засланіць – вушэй асліных мала.

\\
Вось гэту праўду едкіх слоў

Нясу, абураны, я на фашысцкіх соў

I іх заступнікаў-аслоў.

\\
\\
1927

 


===== Падобныя старонкі =====
  * [[творы/якуб-колас/якуб-колас-усход-сонца]]
  * [[ibdc.ped>сонца-не-стаіць-на-месцы]]
  * [[творы/васіль-вітка/васіль-вітка-хто-памагае-сонцу]]
  * [[ibdc.ped>гімн-жыццю]]
  * [[творы/эдзі-агняцвет/эдзі-агняцвет-галоўны-дворнік]]