~~META:
title = Кандрат Крапіва — Кукарэку
&keywords = кукарэку
&abstract = Чытаць байку "Кукарэку" Кандрата Крапівы
&iftrue = nan
~~

====== Кандрат Крапіва — Кукарэку ======
Важак курынай чарады\\
Фарсісты, хоць не малады,\\
Такі быў зух,\\
Што рызыкі хапіла б і на двух,\\
Як прадзеды яго спрадвеку,\\
I ён штодзень галёкаў кукарэку:\\
Перад світаннем, нацямочку,\\
На седале правёўшы ночку,\\
Ён звонкі голас падаваў,\\
Каб, хто жывы, ўставаў.\\
I – дзіва дзіўнае! – як па сігналу,\\
Усё навокал ажывала:\\
Спявалі птушкі у бары,\\
Тарахкалі ў калгасе трактары,\\
На ферму да кароў

спяшаліся даяркі, –

У рух прыходзіла сяло,\\
I сонца, ўстаўшы з-за гары,\\
Дарыла першы промень яркі.\\
Тут Пеўню ў галаву прыйшло,\\
Што гэта ён такую мае ўладу,\\
Што без яго загаду\\
I сонца б не ўзышло.\\
Ну хто б такому даў бы рады?\\
Натхнёны думкаю такой,\\
Ён храбра вёў курэй на грады,\\
Дзе грэблі цэлай талакой.\\
Калі ж драпежніцкі атрад\\
Аднойчы шуганулі з град\\
I цырымоніцца не сталі,\\
А нават пугай адхвасталі,\\
Ён гэтага не мог сцярпець\\
I даў зарок: – Не буду болей пець\\
Ні досвіткам, ні днём.\\
Няхай жа ўсё спіць мёртвым сном,\\
Пакуль я з годзік памаўчу.\\
Ох, я іх правучу! –\\
I сеў на седала – вучыць.\\
Мінае ноч, а ён маўчыць,\\
Змяняе золак цемру ночы.\\
I спеў птушыны ўжо гучыць,\\
А ён заплюшчыў вочы\\
I маўчыць.\\
Ужо і сонейка ўзышло,\\
Усё навокал ажыло.\\
I злосць і дзіва недарэку:\\
– Ды як жа так! Без кукарэку?!\\
\\
Я раіў бы любому чалавеку,\\
Які часамі рэй вядзе\\
I не ў курынай грамадзе,\\
Не захапляцца ўласным «кукарэку»,\\
Калі ўсе ведаюць напэўна,\\
Што сонца ўзыдзе і без пеўня.

 


===== Падобныя старонкі =====
  * [[творы/анатоль-грачанікаў/анатоль-грачанікаў-гусак-і-певень]]
  * [[творы/якуб-колас/якуб-колас-храбры-певень]]
  * [[творы/эдуард-валасевіч/эдуард-валасевіч-сонца-і-певень]]
  * [[творы/вацлаў-ластоўскі/вацлаў-ластоўскі-пад-старасць-адгукнецца]]
  * [[творы/ларыса-геніюш/ларыса-геніюш-певень]]