~~META:
title = Кандрат Крапіва — Дзве кумы
&keywords = кума, кумка, нічога, кажуць, маліцца, богу, чула, кумы
&abstract = Чытаць байку Кандрата Крапівы "Дзве кумы"
&iftrue = nan
~~

====== Кандрат Крапіва — Дзве кумы ======
– Ну як жа, кумка, маецца? –\\
Кума ў кумы пытаецца.\\
– I не пытайся лепш, кума:\\
Цяпер жа, ведаеш сама,\\
Што дзень пражыў, то й дзякуй богу;\\
Не міла, кумка, нек нічога,\\
Нічога нек і не на ўме,–\\
Адказвае кума куме.\\
– Канчына свету, кажуць, блізка:\\
Вось, кажуць (чула ж, можа, й ты?),–\\
Радзіла чорта камуністка;\\
Ёсць рогі, хвост і капыты...\\
– Дык як не чуць? Я чула гэта,\\
Расказвала мне цётка Тэкля;\\
Казала, што за гэта лета\\
Чарцей было б тут, як у пекле,\\
Але таго бог не дапусціць –\\
Ён кару на людзей напусціць,\\
Тады народ увесь пагіне,\\
Мо толькі аднаго пакіне\\
На свеце бог ці двух, як Ноя...\\
Каб, здэцца, кумка, нас з табою.\\
– Хадзем маліцца хіба мы,\\
Каб бог грахі нам адпусціў,\\
Каб кары к нам не дапусціў,–\\
Сказалі разам дзве кумы.\\
Пайшлі ў царкву маліцца богу,\\
Таўкуць ілбамі аб падлогу,\\
Аж лоб трашчыць – лупцуюць цёткі,\\
Баяцца згінуць без пары.\\
А гэтым часам плеткары\\
Майструюць новыя ўжо плёткі –\\
Айцу «святому» заработкі.\\
\\
1923

 


===== Падобныя старонкі =====
  * [[творы/кандрат-крапіва/кандрат-крапіва-махальнік-іваноў]]
  * [[творы/кандрат-крапіва/кандрат-крапіва-хто-смяецца-апошнім-анал]]
  * [[творы/кандрат-крапіва/ідэйная-накіраванасць-камедыі-кандрата-к]]
  * [[постаці/кандрат-крапіва]]
  * [[творы/кандрат-крапіва/кандрат-крапіва-байкапісец-ідэйная-накір]]