~~META:
title = Кандрат Крапіва — Астрыжаны вожык
&keywords = мядзведзь, вожык, дабраты, калючак, ліса, Міхал, сабе, гэта
&abstract = Чытаць байку Кандрата Крапівы "Астрыжаны вожык"
&iftrue = nan
~~

====== Кандрат Крапіва — Астрыжаны вожык ======
Ва ўладара лясоў

Мядзведзя-старажыла

Ліса памочніцай служыла:\\
Вяла улік усіх звяроў,\\
Дакладвала: хто жыў-здароў,\\
Хто капытамі налажыў,\\
Хто грызся з кім і з кім дружыў.\\
I хто пра што пішчаў і роў,\\
Хто адабрэння заслужыў,\\
А на каго накладваць кару –\\
Прыносіць у ахвяру, –\\
Ну, адным словам, памагала\\
Мядзведзю кіраваць.\\
Пры гэтым бессаромна лгала,\\
Каб і сабе кавалак уварваць.\\
Што б ні пляла Лісіца-хлус,\\
Мядзведзь усё матаў на вус.\\
Пры рапарце яна сказала раз,\\
Што ўжо даўно яе трывожыць\\
Мясцовы дзікабраз,\\
Іначы кажучы, няўклюда Вожык.\\
Такая патароча,\\
Што знацца з ім ніхто не хоча,\\
Ды як тут сябраваць і ладзіць?\\
Ні дакрануцца, ні пагладзіць.\\
Пакутуе і сам ён, небарак.\\
А па характару ж – дабрак,\\
I каб не гэтыя калючыя драты,\\
Ён быў бы ў нас узорам дабраты.\\
– Калючкі – што! –

сказаў Мядзведзь. –

Важней нам у нутро глядзець.\\
– Каб тых калючак дзве ці тры,\\
Дык ліха іх бяры,\\
Не стала б настырацца я,\\
А тут жа канцэнтрацыя.\\
I для здароўя гэта шкодзіць.\\
Вы ж бачыце, які ён стаў,\\
I справу б добрую зрабілі,\\
Каб самі з ім пагаварылі.\\
Матэрыял я падбяру.\\
– Ну добра, я пагавару.\\
Скажы, няхай заходзіць, –\\
Мядзведзь прамармытаў.\\
Ліса здаволена: Міхал Патапыч\\
Пагаварыць патрапіць.\\
I сапраўды – у хуткім часе\\
Гаворка тая адбылася.\\
Была яна сардэчнай і лагоднай\\
Аб вопратцы нязграбнай і нямоднай,\\
Якую недарэчы\\
Прастак надзеў сабе на плечы,\\
Хоць лепш яму б дублёнка падышла.\\
Як Вожык гэта ўзяў на веру,\\
Цырульнікі, старанныя не ў меру,\\
Яго пад нуль астрыглі, дагала,\\
I ён Лісе дастаўся на вячэру.\\
Вось так змяняў ён сваю шубу\\
Сабе на згубу.\\
\\
Яго наказ вам, вожыкі-браты:\\
Не разяўляйце вы раты,\\
Як хочуць вас зрабіць узорам дабраты,\\
Асцерагайцеся лісіных штучак,\\
Каб не застацца без калючак.\\
\\
1981

 


===== Падобныя старонкі =====
  * [[творы/кандрат-крапіва/кандрат-крапіва-хто-смяецца-апошнім-анал]]
  * [[творы/кандрат-крапіва/ідэйная-накіраванасць-камедыі-кандрата-к]]
  * [[творы/кандрат-крапіва/кандрат-крапіва-байкапісец-ідэйная-накір]]
  * [[постаці/кандрат-крапіва]]
  * [[творы/кандрат-крапіва/кандрат-крапіва-махальнік-іваноў]]