~~META:
title = Казімір Камейша — Нёману
&keywords = вясну, людзі, льдзіны
&abstract = Чытаць верш Казіміра Камейшы "Нёману"
&iftrue = nan
~~

====== Казімір Камейша — Нёману ======
Чаўны твае адчальваюць у памяць.\\
Стаміліся старыя рыбаловы.\\
Мне бачна, як кастры яны распальваюць,\\
Даносіць вецер да мяне іх словы.\\
Нібы твае віры, ўспаміны тузаюць,\\
І чую я трывожна, як віну,\\
Ля самага праліва Лаперуза\\
Тваю усхваляваную вясну.\\
Знішчаецца рашуча ўлада льдоў,\\
У пальцах плыні льдзіны, нібы цацкі.\\
Дзе чалавек, гавораць, там і дом.\\
Ды ёсць адзін, які належыць цалкам.\\
Не тую б хвалю ў вусны цалаваў,\\
Што сёння я задумліва цалую.\\
І кружыцца, як кола, галава,\\
І я у думках да цябе вяслую.\\
А заўтра пошту зноўку прынясуць,\\
І весткі ад цябе калі не будзе,\\
Я зноў на бераг свой адпраўлю сум,\\
І хай яго заўважаць людзі.\\
Нялёгка без тваёй мне глыбіні.\\
Штоноч твая мне сніцца хуткаплыннасць,\\
Бо душы ў нас з табой адны,\\
Адны у іх невады і льдзіны.

 


===== Падобныя старонкі =====
  * [[ibdc.ped>каля-нёмана]]
  * [[ibdc.ped>гімн-жыццю]]
  * [[ibdc.ped>берагам-нёмана]]
  * [[ibdc.ped>празрыстая-пара-восені]]
  * [[ibdc.ped>старанная-праца]]