~~META:
title = Казімір Камейша — Ганчары
&keywords = збанок, рука, печы, жывы, зарана, гліне
&abstract = Чытаць верш Казіміра Камейшы "Ганчары"
&iftrue = nan
~~

====== Казімір Камейша — Ганчары ======
Замесяць гліну, нібы цеста.\\
Глядзіш, і гліны не пазнаць.\\
I чуеш, што ў руках ёй цесна,\\
На волю просіцца яна.\\
\\
Нібыта дыхае між пальцаў\\
Жывы і цёплы камячок.\\
Рука бывалага пушчанца\\
Не пашкадуе плескачоў,\\
\\
Пакуль не зробіць паслухмяным,\\
Зусім падатлівым яго.\\
Але у печ яшчэ зарана,\\
Яшчэ зарана у агонь.\\
\\
Яго кладуць на круг ганчарны:\\
Няхай пакружыцца усмак.\\
I вось у танцы незвычайным\\
Адчайна кружыцца камяк.\\
\\
Спачатку выцягне ён шыю,\\
Пасля раздасца у баках.\\
I рысы свежыя, жывыя\\
На гліне выведзе рука.\\
\\
Пасля ганчар яго пагладзіць.\\
I, закасаўшы рукавы,\\
Ён ручку, як руку, прыладзіць.\\
Збанок, і праўда, як жывы.\\
\\
Пара яго і ў печ адправіць.\\
Ён урачыста едзе ў печ.\\
Яго суседзі злева, справа\\
За ім стараюцца паспець.\\
\\
Ён возьме ў полымя трываласць.\\
I будзе печы ўдзячны ён,\\
Што гартавала, глянцавала\\
I ў сценкі пасяліла звон.\\
\\
А з печы выплыве, – аж ззяе.\\
Хвала і гліне, і майстрам!\\
Жыве збанок, збанок спявае\\
На далані у ганчара.

 


===== Падобныя старонкі =====
  * [[ibdc.ped>званы-хатыні]]
  * [[творы/казімір-камейша/казімір-камейша-камень-ля-вёскі-камень]]
  * [[ibdc.ped>тураў-3838]]
  * [[творы/казімір-камейша/казімір-камейша-першы-снег]]
  * [[творы/казімір-камейша/казімір-камейша-метрабудаўцы]]