~~META:
title = Зоська Верас — Прыйшла вясна
&keywords = янка, снег, палі, бацька, вясна, зямлі, сонейка, садка, сынок, раніцы
&abstract = Апавяданне Зоські Верас "Прыйшла вясна"
&iftrue = nan
~~

====== Зоська Верас — Прыйшла вясна ======
**І**

Хоць мароз яшчэ парою дакучаў ды і снег яшчэ не зняў з зямлі сваёй белай посцілкі, але ж сонейка неяк мацней ужо грэла і залівала ціхія палі і сенажаці.\\
Яго магутныя прамяні ўпалі і на страху Янкавай хаткі і нават заглянулі праз акенца ўсярэдзіну. Янка адчуў іх цёплую ласку, зразумеў ціхі прызыў і, хуценька апрануўшыся, выбег у садок.\\
Там яго бацька ўважна аглядаў кожнае дрэва. Ён адпілоўваў сухія непатрэбныя галінкі, а пасля ачышчаў пні і грубейшыя сукі ад моху.\\


**ІІ**

Угледзеўшы Янку, бацька весела крыкнуў:\\
– Што, сынок, сустракаць вясну выйшаў?\\
– А дзе ж тая вясна? Снег усюды ляжыць. Ды яшчэ гэтак сцюдзёна, – маркотна адказаў Янка, паціраючы пачырванелыя ручкі.\\
– Пачакай, сынок, будзе ўжо цёпла і хораша, – сказаў бацька. – Кожны дзень вясна да нас набліжаецца. Вось з гэтых пучкоў, што бачыш на дрэвах і кустах, вырастуць зялёныя лісточкі. Палі зазелянеюць. Як толькі сыдзе снег з лясных узгоркаў, глянуць на нас з-пад кустоў ляшчыны сіненькія вочкі пралесак. Помніш, колькі іх было летась?\\
– Я помню, помню, татачка. Дык як закрасуюць пралескі, то ўжо будзе вясна? – пытаўся Янка.\\
Ён пастаяў яшчэ крыху, падумаў ды пайшоў дахаты.\\


**ІІІ**

У наступныя дні надвор’е было вельмі кепскае. Дробны дождж барабаніў у вокны ад раніцы да вечара, а вецер згінаў дрэвы аж да зямлі. Доўга прыйшлося сядзець Янку ў хаце. Аж нарэшце аднае раніцы сонейка неспадзявана выглянула з-за хмар. Хлопчык выбег у садок. Якая перамена! Як цяпер інакш усё выглядала! Снегу не было нідзе ні крышку. Праз жоўтую леташнюю траву прабівалася ўжо свежанькая зялёная траўка. Кусты агрэсту пакрыліся маладзенькімі лісточкамі.\\
Высока ў небе звінеў жаўранак. А на страсе адрыны стаяў бусел.

 


===== Падобныя старонкі =====
  * [[ibdc.ped>абуджэнне-3649]]
  * [[ibdc.ped>сустрэча-вясны]]
  * [[творы/якуб-колас/якуб-колас-вясна]]
  * [[ibdc.ped>гуканне-вясны]]
  * [[ibdc.ped>прыход-вясны]]