~~META:
title = Змітрок Бядуля — Сняжынкі
&keywords = гаі, хатачкі-палатачкі, спявалі, сняжыначкі-пушыначкі, хаткі
&abstract = Чытаць верш Змітрака Бядулі "Сняжынкі"
&iftrue = nan
~~

====== Змітрок Бядуля — Сняжынкі ======
Сняжыначкі-пушыначкі\\
Ляцелі матылькамі.\\
Над хмызамі над шызымі\\
Дыміліся дымкамі.\\
\\
Зіхцеліся, мігцеліся\\
У розныя калёры.\\
Драбнюткія, пякнюткія,\\
Як зоранькі, як зоры.\\
\\
Насіліся, кружыліся\\
Над ціхімі палямі,\\
Даліначкі сняжыначкі\\
Пакрылі дыванамі.\\
\\
Над ёлкамі, над хвойкамі\\
Спявалі спевы-баі:\\
"Мы хатачкі-палатачкі,\\
Будуем тут у гаі.\\
\\
Маленькія, міленькія\\
Дзіцяткі-птушаняткі,\\
Ляціце вы, скачыце вы\\
У светленькія хаткі!\\
\\
Вушастыя, пушыстыя,\\
З драцінкамі-вусамі\\
Вы, зайчыкі-малойчыкі,\\
У хаткі к нам таксама!"\\
\\
Сняжыначкі-пушыначкі\\
Спявалі песні-баі:\\
"Мы хатачкі-палатачкі\\
Будуем тут у гаі".

 


===== Падобныя старонкі =====
  * [[ibdc.ped>першы-снег]]
  * [[творы/якуб-колас/якуб-колас-першы-снег]]
  * [[творы/паўлюк-трус/паўлюк-трус-падаюць-сняжынкі]]
  * [[ibdc.ped>першы-снег-3700]]
  * [[творы/казімір-камейша/казімір-камейша-першы-снег]]