~~META:
title = Змітрок Бядуля — Плач пралескаў
&keywords = Бядуля, плач, пралескі
&abstract = Чытаць абразок "Плач пралескаў" Змітрака Бядулі
&iftrue = nan
~~

====== Змітрок Бядуля — Плач пралескаў ======
Плакалі пралескі, дзеці вясны…\\
Гэта раса на кволых пялёстках! – пяяў жаўранак і кружыўся над імі…\\
Фарбаваныя небам, узгадаваныя сонейкам, яны на чорнай зямлі не хацелі перажыць нават ад маладзіка да ветаха вясенняга месяца… плакалі ды плакалі… Месцамі па лагчынах лядок стаяў, месцамі траўкі зазелянеліся…\\
…………………………………………………………………………………………………………………\\
Новыя дарогі панёс на плячах араты ад каваля; дзяцюк ахвотна быкоў накарміў. Палала зарніца над бярэзнікам. У вёсцы з закураных каміноў круціўся ўверх, быццам кудзеля, белы дым – гаспадыні сняданне рыхтавалі. Выйшла дзяўчына першы раз босая ў чыстае поле; убачыла, як палескі слёзы льюць, ды сама заплакала.\\
– Ой, мяне за нямілага замуж выдаюць!\\
– Ой, пагубіла я леты маладыя свае!..\\
Абхапіла рукамі бярозку маладую ды абамлела разам з ёй…\\
А вакол плакалі пралескі, дзеці вясны…

 


===== Падобныя старонкі =====
  * [[ibdc.ped>дзеці-сонца]]
  * [[творы/змітрок-бядуля/змітрок-бядуля-на-каляды-к-сыну]]
  * [[постаці/змітрок-бядуля]]
  * [[ibdc.ped>міхасёвы-пралескі]]
  * [[творы/змітрок-бядуля/змітрок-бядуля-велікодныя-яйкі]]