~~META:
title = Змітрок Бядуля — Мяцежнік
&keywords = бура
&abstract = Чытаць верш Змітрака Бядулі "Мяцежнік"
&iftrue = nan
~~

====== Змітрок Бядуля — Мяцежнік ======
Смерць...\\
Бура...\\
Трывога...\\
Не йдзі...\\
Ой, не йдзі ты,\\
Асілак-юнача!\\
Бо перад табою\\
Страшная дарога,\\
Пагінеш...\\
Пагінеш...\\
Няйначай...\\
Пад небам імчацца чырвоныя коні,\\
Пярун з навальніцай\\
Рагочуць на гонях.\\
I страх\\
I дрыготы\\
Абшар абвілі,\\
Віхорыцца ўсё на зямлі...\\
I кроў...\\
I руіны...\\
Ой, горкая будзе, дзяцюк, твая доля! –\\
Смерць зрэжа касою,\\
Бы кветку-расліну,\\
Груган знясе косці па полі...\\
. . . . . . . . . . .\\
Пайду я!\\
Злавацца!\\
Хмялець!\\
Загарэцца!\\
Ўсім светам магу кіраваць я, здаецца!\\
Як пушчаны некім,\\
Імпэтпай стралой\\
Памчуся ўгару!\\
Над зямлёй!\\
Мне полымя!\\
Крыллі!\\
Я –\\
Сокалам вольным у тыя абшары,\\
Дзе громы ў высотах пуціну прарылі!\\
Сусветнасць\\
Я кіну ў пажары...\\
Хай граюць,\\
Буяюць\\
Віхровыя хвалі!\\
Хай плачуць,\\
Хай скачуць –\\
Ім вольніцу далі.\\
А мора мяцежнае –\\
Маткаю мне.\\
А бура –\\
Ў грудзях у мяне.\\
Я – гнеўны паўстанец!\\
Я – вольны мяцежнік!\\
Я – славай кірую!\\
Я – сонечны воін!\\
Я – гром-зоратканец!\\
Я – з цемрай вячыстай ваюю!\\
Я – волю з жалезных клыкоў вырываю!\\
Я – гнеў гарапашных!\\
Я – злосць агнявая!\\
Я – помста\\
За здзекі,\\
За кроў,\\
За шмат слёз!\\
Мне – крок\\
Ад зямлі да нябёс!\\
. . . . . . . . . .\\
Памчаўся\\
Далёка...\\
Прапаў...\\
I не вернецца смелы\\
Ніколі!..\\
Яго не ўбача ўжо матчына вока...\\
I грудзі парвуцца ад болю.\\
Яму за адвагу\\
Пахвалы не трэба.\\
Яму шлях бунтарскі –\\
Зарніца у небе.\\
Ён –\\
Шчасце,\\
Ён –\\
Мара\\
Адважных людзей.\\
Ён – песня\\
Старых і дзяцей.

 


===== Падобныя старонкі =====
  * [[творы/змітрок-бядуля/змітрок-бядуля-маці]]
  * [[творы/змітрок-бядуля/змітрок-бядуля-велікодныя-яйкі]]
  * [[творы/змітрок-бядуля/змітрок-бядуля-на-каляды-к-сыну]]
  * [[творы/змітрок-бядуля/змітрок-бядуля-нібы-рупны-араты]]
  * [[постаці/змітрок-бядуля]]