~~META:
title = Змітрок Бядуля — Калыханка
&keywords = зрабі, янка, яначка, гусачок, певунок, пайшоў, схадзі, жвавы
&abstract = Чытаць "Калыханку" Змітрака Бядулі
&iftrue = nan
~~

====== Змітрок Бядуля — Калыханка ======
Кукарэку, певунок!\\
Пашый Янку кажушок,\\
Шапачку бабровую,\\
Боцікі казловыя.\\
\\
– Я пашыю, я зраблю,\\
Бо я хлопчыка люблю.\\
\\
Мяў-мяў, рабенькі каток!\\
Схадзі, коцік, на таржок,\\
Купіш абараначкаў,\\
Будзе есці Яначка.\\
\\
І пайшоў ён, і купіў,\\
І малога накарміў.\\
\\
Му-му, трацячок-бычок!\\
Ты да пчол схадзі ў садок.\\
Ад пчалінай мамачкі\\
Нясі мёду Яначку.\\
\\
І пайшоў у сад бычок,\\
І мядку прынёс збанок.\\
\\
Го-го, жвавы гусачок!\\
Зрабі Янку ветрачок\\
З тваіх пер’яў точаных,\\
Сонцам пазалочаных.\\
\\
І зрабіў сваяк-гусак\\
З пер’яў хлопчыку вятрак.\\
\\
Піск-піск, мышка-мышанё!\\
Збегай зараз на гумно,\\
Зрабі Янку граечку,\\
З стружак балалаечку.\\
\\
– Балалаек зраблю пяць,\\
Будзе Яначка іграць.\\
\\
Ты, сыночку мой, засні.\\
А-ля-лю-лі, а-лю-лі.\\
Пад тваёй калыскаю\\
Котка дрэмле з мышкаю.\\
\\
Спяць браток і певунок,\\
Спіць і жвавы гусачок.\\
\\
Вось ідзе ён, вось і ён –\\
У кашульцы белай сон.\\
Казкі-байкі баюцца,\\
Вочанькі зліпаюцца.\\
\\
Не шуміце... ну, ну, ну!\\
Хлопчык Яначка заснуў...

 


===== Падобныя старонкі =====
  * [[творы/алесь-камароўскі/алесь-камароўскі-чарнобыльская-калыханка]]
  * [[ibdc.ped>калыханка]]
  * [[творы/ніна-мацяш/ніна-мацяш-калыханка-маме]]
  * [[творы/васіль-вітка/васіль-вітка-калыханка]]
  * [[слоўнік/калыханка]]