~~META:
title = Змітрок Бядуля — Думкі апоўначы – кветкі расістыя...
&keywords = думкі
&abstract = Чытаць верш Змітрака Бядулі "Думкі апоўначы – кветкі расістыя..."
&iftrue = nan
~~

====== Змітрок Бядуля — Думкі апоўначы – кветкі расістыя... ======
Думкі апоўначы – кветкі расістыя –\\
Сэрца смяротнага спевы вячыстыя,\\
\\
Птушкамі ціхімі ймчаліся ў выраі,\\
Ў неба халоднае біліся крыллямі.\\
\\
Пчолкі маўклівыя – зоранькі пільныя\\
Іх сустракалі там цішай магільнаю.\\
\\
Месяц палохаў іх сном-таямніцаю,\\
Путаў іх, блутаў іх срэбнай расіцаю.\\
\\
Хмаркі кудзельныя, лёгкія, зграбныя\\
Цьмой-павуцінаю клікалі-вабілі.\\
\\
Далі трывожылі сінімі дахамі,\\
Хвойнымі процьмамі, шызымі страхамі.\\
\\
Думкі апоўначы – ягадкі спелыя –\\
З неба вярнуліся асірацелыя.\\
\\
Думкі, да месяца не ўзнімайцеся.\\
Лепш вы зямеліцы блізкай трымайцеся.

 


===== Падобныя старонкі =====
  * [[творы/змітрок-бядуля/змітрок-бядуля-на-каляды-к-сыну]]
  * [[творы/змітрок-бядуля/змітрок-бядуля-маці]]
  * [[творы/змітрок-бядуля/змітрок-бядуля-нібы-рупны-араты]]
  * [[постаці/змітрок-бядуля]]
  * [[творы/змітрок-бядуля/змітрок-бядуля-велікодныя-яйкі]]