~~META:
title = Еўдакія Лось — Хударлявай дзяўчынкай бяляваю...
&keywords = такое, вайна, хата
&abstract = Чытаць верш Еўдакіі Лось "Хударлявай дзяўчынкай бяляваю..."
&iftrue = nan
~~

====== Еўдакія Лось — Хударлявай дзяўчынкай бяляваю... ======
Хударлявай дзяўчынкай бяляваю\\
Я расла у глухім мястэчку,\\
Дзе спяваліся песні слаўныя,\\
Дзе схіляліся вербы над рэчкай.\\
\\
Я любіла матулю строгую,\\
I нястрогага бацьку з вусамі,\\
I ў палоскі сукенку новую,\\
Што куплялі ў раённай краме...\\
\\
I на санках было мне хораша,\\
I на шыі ў асілка-брата;\\
Мне здавалася светлым хорамам\\
З сукаватых бярвенняў хата...\\
\\
Не лічылася з гэтым вайна,\\
Як завыла над краем яна...\\
Падпаліла з бярвенняў хату,\\
Пахавала ў акопе брата...\\
\\
I якой толькі ў свеце бяды\\
Не спазнала я ў тыя гады!..\\
\\
Што такое бяздом’е сцюжнае,\\
Што такое бяссонне мужнае,\\
Што такое, як есці хочацца,\\
Што такое, як раны сочацца...\\
\\
I хоць вырасла ўсё ж бялявай,\\
Не скалечанай, хударлявай, –\\
Я жадаю, каб век дзіцячы\\
Размінаўся з бядою, з плачам.\\
\\
1957

 


===== Падобныя старонкі =====
  * [[творы/еўдакія-лось/жыццёвы-і-творчы-шлях-еўдакіі-лось]]
  * [[творы/еўдакія-лось/еўдакія-лось-уцякач]]
  * [[творы/еўдакія-лось/еўдакія-лось-казка-пра-ласку]]
  * [[творы/еўдакія-лось/еўдакія-лось-зайчык-выхваляйчык]]
  * [[творы/еўдакія-лось/еўдакія-лось-маці]]