~~META:
title = Еўдакія Лось — Успамін аб лепельскай дарозе
&keywords = ішлі
&abstract = Чытаць верш Еўдакіі Лось "Успамін аб лепельскай дарозе"
&iftrue = nan
~~

====== Еўдакія Лось — Успамін аб лепельскай дарозе ======
Зімой сляпіла завіруха,\\
улетку ногі сек жарсцвяк.\\
Ішлі імжой, ішлі, як суха,\\
калі пад’еўшы, калі – так...\\
Ішлі натхнёныя дзяўчынкі\\
дарогай ранішняй зары.\\
Вятры трапалі іх хусцінкі,\\
туліў ад веі бор стары.\\
Яны вясёла гаманілі\\
на першых вёрстах дваццаці,\\
хаця нічога не ўлучылі\\
і не спазналі у жыцці.\\
Апроч бяды, вайны гарачай,\\
што іх, як кветкі, апякла.\\
Дарожанька, пасля бядачай,\\
у міры – першаю была.\\
Вяла да кніжчынага свята,\\
таму й сама была святой, –\\
хоць падбіваліся дзяўчаты\\
дзесь на вярсце саракавой...\\
Цяпер па ёй не ездзяць многа,\\
бо лічыцца, што лішні круг.\\
З Ушач да Лепеля дарога\\
даўно раўнейшая, мой друг.\\
Імчыш ты ў свет на шпаркіх колах\\
асфальтаванаю шашой!\\
А я усё іду, наўкола,\\
са спадарожніцай-сястрой...\\
\\
1970\\


\\
Крыніца: Лось Е. І каласуе даўгалецце: Вершы / Уклад. М. Я. Ярашэвіч, М. Я. Клімовіч. – Мн.: Маст. літ., 1998. – 367 с.

 


===== Падобныя старонкі =====
  * [[творы/еўдакія-лось/еўдакія-лось-зайчык-выхваляйчык]]
  * [[творы/еўдакія-лось/жыццёвы-і-творчы-шлях-еўдакіі-лось]]
  * [[творы/еўдакія-лось/еўдакія-лось-маці]]
  * [[творы/еўдакія-лось/еўдакія-лось-уцякач]]
  * [[творы/еўдакія-лось/еўдакія-лось-казка-пра-ласку]]