~~META:
title = Еўдакія Лось — Ні тумановых занавесак...
&keywords = пралесак, снегу
&abstract = Чытаць верш Еўдакіі Лось "Ні тумановых занавесак..."
&iftrue = nan
~~

====== Еўдакія Лось — Ні тумановых занавесак... ======
Ні тумановых занавесак,\\
ні перашкодных раўчукоў...\\
Наведаюся да пралесак,\\
да сонных дзядзечак-смарчкоў!\\
Да цётак-елак на палянах,\\
да палахлівенькіх асін,\\
да ядлаўцоў, ад дыму п'яных,\\
і стройных мачтавых лясін.\\
Яны мяне заўжды чакалі\\
і абдымалі, як сваю.\\
На што я жалюся, пыталі,\\
пра што я, слухалі, пяю...\\
А я не жалюся, сябрына\\
мая купчастая ў бары!\\
Імчыць жыцця майго машына,\\
аж сонца цешыцца ўгары.\\
Што тая з ветру пацяруха,\\
што тыя купіны-карчы,\\
калі супроць іх – сіла духа,\\
непераможная, лічы!\\
Пралеска, ты пра гэта знаеш,\\
і да цябе знарок іду:\\
ты, кволая, перамагаеш\\
навалы снегу і ільду.\\
\\
1972

 


===== Падобныя старонкі =====
  * [[творы/еўдакія-лось/еўдакія-лось-маці]]
  * [[творы/еўдакія-лось/еўдакія-лось-зайчык-выхваляйчык]]
  * [[творы/еўдакія-лось/еўдакія-лось-казка-пра-ласку]]
  * [[творы/еўдакія-лось/еўдакія-лось-уцякач]]
  * [[творы/еўдакія-лось/жыццёвы-і-творчы-шлях-еўдакіі-лось]]