~~META:
title = Данута Бічэль-Загнетава — Цётка
&keywords = Бічэль, Загнетава, цётка
&abstract = Чытаць верш Дануты Бічэль-Загнетавай "Цётка"
&iftrue = nan
~~

====== Данута Бічэль-Загнетава — Цётка ======
Цётка...\\
Як песні зваротка.\\
Як песні радочак...\\
Паеду да Цёткі —\\
пляменніца ўсё-ткі,\\
займу свой куточак.\\
\\
Стагоддзя пачатак.\\
Не людзі, а статак,\\
ніякае мэты.\\
А нейкі дзесятак\\
мужчын і дзяўчатак\\
даюць ім газеты.\\
\\
Чытанне для дзетак.\\
Навукі палетак.\\
Сяброўскія складкі.\\
Заглянула сонца —\\
і ў наша ваконца, —\\
няма ні дзіцяткі.\\
\\
Народы-суседзі\\
у шчырай бяседзе\\
у вольнай пастаці.\\
А дзе ж наш народзе?\\
А Цётка не родзіць,\\
а Цётка не маці.\\
\\
Вусаты, хвастаты\\
і ўсё супастаты\\
заходзяцца лаем.\\
I школьнай граматыкі\\
правілы маем,\\
а мовы не маем.\\
\\
Няўжо ты, араты,\\
зямлі сваей страты\\
не здольны прыкмеціць?\\
А душачка Цёткі,\\
бы промень зіхоткі,\\
усё яшчэ свеціць.

 


===== Падобныя старонкі =====
  * [[творы/цётка-алаіза-пашкевіч/цётка-алаіза-пашкевіч]]
  * [[творы/цётка-алаіза-пашкевіч/цётка-міхаська]]
  * [[творы/цётка-алаіза-пашкевіч/цётка-прысяга-над-крывавымі-разорамі]]
  * [[творы/цётка-алаіза-пашкевіч/цётка-мора]]
  * [[творы/цётка-алаіза-пашкевіч/цётка-сварба]]